National Rural Health Mission chuan kum 2012-13 chhunga an hmalakna hrang hrang te thlirletna 1st Quarter Review meeting ni hnih awh tur chu Health Directorate Conference Hall, Dinthar, Aizawl ah an nei.

He meeting ah hian District tin a Chief Medical Officer(CMO), Senior Medical Officer(SMO) leh Programme Officer te, District Programme Manager(DPM) te an kal tha hle a, Dr.Lalrinliana Sailo, Director, Hospital & Medical Education chuan a hmanpui a, District hrang hrang atanga hmalak dan report ngaihthlak a ni a, Programme thenkhat a kalphung thar leh tan lak ngaihna tur thenkhat te sawiho a ni bawk.

Mission Director, Dr.Gordon Zohmingthanga chuan Supervision leh monitoring lamah tan lak leh zual a tul thu leh Documentation ah te, Data report chungchang ah te taimak chhuah leh zual a ngai a, India ram ah State dangte entawntlak, hmasawn ber kan ni thei a, Mizo mipui te tan mai bak ah India ram tan ngei pawh contribution tha tak kan neih ngei theih nan tan kan lak a ngai a ni a ti.

Dr. Lalthanga, State Programme Officer, RCH chuan 1st Quarter chhunga hmalak tawhna tlangpui report pe in Kum 2013 April atanga June thla chhungin Mizoram ah Naupai in register mi 6641 awmin heng zinga mi 4649 te hian Damdawiin ah nau an nei a ni ati. Mi 2263 te hnen ah Damdawiin a nau nei tanpuina Janani Suraksha Yogona(JSY) scheme hnuai ah pek an ni a, mi 1833 te hnen ah free transportation JSSK hnuai ah pek a ni a, mi 2997 te hnen ah free treatment pek a ni a ti bawk. Naupang kum 5 hnuai lam 80% atanga 90% Mizoram pum ah Zenghri venna (Polio Vaccine) pek a ni a, August ni 1 atang khan Zokhawthar ah naupang kum 5 hnuailam rawn lut leh chhuak te hnen ah Polio Vaccine (Zenghri Venna) pek tan anih bak ah Central Sorkar in Vaccine Van 2 Mizoram tan a rawn pe thar bawk a ti.