Vawiin khan PHE Conference Hall, Bazar Veng, Lunglei-ah ‘National Sanitation Campaign 2014’ kharna inkhawm neih a ni a. He hun hi EE PHE & Secretary, District Water & Sanitation Mission Lunglei District Er.J.Kapkima chuan a kaihruai a, EE(P) PHED Er.C.Lalzidinga chu Khuallian a ni.

Campaign khartu EE(P) PHED Er.C.Lalzidinga chuan Mahni Veng, Khawpui leh Ram faina kawngah mitin te mawhphurhna kan nei a, bawlhhlawh chu a paihnaah kan paih lo chuan hmun tibaltu leh tihnawktuah a tang zel a ni, a ti. Mahni taksa kan tihfai leh kan chei peih ang bawkin kan inchhung, hnathawhna hmun leh puipunna hmunte pawh hi duat leh enkawl hi kan tih makmawh a ni, a ti. Sanittation Campaign hi khar mahila a bul kan tan dawn chuah a ni tih hria ila, Campaign hi chu mipuite kan inzirtirna leh inhrilhhriatna chauh a ni, a ti bawk.

District Water & Sanitation Mission Er.J.Kapkima pawhin thu sawiin ‘National sanitation Campaign hi rampumah October ni 2 atanga tan a ni a, ram hotulu ber Prime Minister hovin New Delhi-ah he Campaign hi hawn a nih thu a tarlang a. Mipuite chu faina kawngah zirtirna pek mek a ni a, a bik takin inthiarna fai leh thianghlim, kut silfai that, naupang ek paih fimkhur bakah tui sawngbawlna leh khawl danah te zirtirna pek chho zel a ni, a ti. Khawpui chhungah mipuite chhiar theih turin Poster leh Hoarding tar a nih bakah faina lam thupui hmanga thu inziahsiak buatsaih a ni bawk tih a sawi a. Er.Lalmama, AE chuan SIPMIU hnuaiah an hmalaknate tarlangin kum 2015 chhungin Town Area chinah ek thli leh tuichhiah sawngbawl vek tur a ni a, Lunglei khawchhungah pawh ek thli leh tuichhiah sawngbawlna turin IPE Global Ltd. Company, Mumbai chuan Survey an neih mek thu a tarlang.

Sanitation chungchanga Article inziahsiaknaa lawmman latute chu :

1st Prize : Laltanpuia, Electric Veng (Certificate + Rs.5,000/-)

2nd Prize : B.Lalthlamuanpuii, New Lungrang (Certificate + Rs.3,000/-)

3rd Prize : C.Lalmuankima, Zohnuai (Certificate + Rs.2000/-)

Hla inphuahsiaka lawmman latute chu :

1st Prize : C.Lalhruaitluanga, Chanmari-II (Certificate + Rs.5,000/-)

2nd Prize : K.Laldingngheta, Venglai(Certificate + Rs.3,000/-)

3rd Prize : F.Lalngaizuala, Ramthar (Certificate + Rs.2,000/-) te an ni.