Vawiin khan Mamit District Bawngva khuaah Soil & Water Conservation Department hnuaia NLUP 2nd Phase chu Pu John Rotluangliana, Minister FCS & CA leh bialtu MLA nibawk chuan a sem.

NLUP semna hi BNRGSK building ah neih a ni a. Hetah hian kalkhawmte hmaah thusawiin Minister chuan NLUP dawngtute chu an pawisa dawnte a hmanna tur dik taka hmang tura chahin sorkar-in mipui ten leirem kan rahna tura ruahmanna min siam sak hi ti hlawhtling a, kan tu leh fate tan eizawnna ngelnghet siam sak thei turin vawiina kan pawisa dawn te hi a hmanna tur dik taka kan hman a pawimawh a ni, a ti.

Minister chuan Mamit District hi thlai tinreng thatna hmun a nih avangin kan trade thlan theuhte puitlin theihna hmun a ni a, taima tak leh tih takzeta hmalaa hlawhtlinpui ngei turin a chah a ni.

Vawiina NLUP sem hi rubber trade ah chhungkaw 1 in Rs. 33,200/- dawngin chhungkaw 16 tan Rs. 5,31,200 sem chhuah a ni a. Hmunphiah trade thlangtu chhungkaw 17 tan Rs. 6,14,040 semchhuah niin chhungkaw 1 in Rs. 36,120/- theuh an dawng a ni.