3437/2023-2024

22^nd January, 2024 : Vawiin khan National School Band Competition chu Major Dhyanchand National Stadium New Delhi-ah neih a ni a, Govt Mizo High School Pipe Band Boys chu 3-na an ni. National School Band competition-ah hian pakhatna chu PM SHRI School Jawahar Navodaya Vidyalaya , Suratgarh, Sriganganagar, Rajasthan an ni a, pahnihna chu Andhra Pradesh Social Welfare Residential School, Arugolanu, West Godavari an ni. Govt Mizo High School hi December 22,2023 khan National School Band competition-a tel tur thlanna Zonal Band competition Bhubaneswar-a neihah pakhatna an lo ni tawh a ni.

National Band Competition-ah hian Zone hrang hrang atanga thlanchhuah state 15 an tel a, chungte chu - Andhra Pradesh, Delhi, Gujarat, Himachal Pradesh, Karnataka, Kerala, Madhya Pradesh, Maharashtra, Mizoram, Odisha, Puducherry, Rajasthan, Sikkim, Tripura leh Uttar Pradesh te an ni.

School Band Competition hi Ministry of Education-in Ministry of Defence-te nen thawk hovin kum tin a buatsaih thin a, State level atanga National level thleng hian Samagra Shiksha ten an buaipui thin a ni. Band competition hi  chhawng thumin intihsiak thin a ni a. State level School Band competition neih hmasak ber thin a ni a, chuta pakhatna theuhte chu Zonal level competition-ah an inel leh a, Zonal level-a tithate chu National levelah an intihsiak leh ta thin a ni.

Band Competition-ah hian Zonal level-ah India ram state leh UT te hi zone 4-ah an then a, Eastern zone, Western zone, Southern zone leh Northern zone tiin then a ni. Mizoram hi Eastern zone-ah kan awm a, Eastern zone-a awmte chu - Jharkhand, West Bengal, Odisha, Arunachal Pradesh, Assam, Meghalaya, Manipur, Mizoram, Nagaland, Tripura lehn Sikkim te an ni.   Zonal level competition-a tithate chu National level New Delhi-ah an intihsiak leh ta thin a ni.