‘National Technology Day 2018’ lawmna hun chu vawiin khan Directorate of Science & Technology, New Secretariat Complex-ah buatsaih a ni a; he hunah hian Planning Minister Pu Lalsawta chu Khuallian a ni.

‘National Technology Day’ puala inkhawm Planning Secretary Dr.C.Vanlalramsanga kaihhruaiah Khuallian Planning Minister Pu Lalsawta chuan tunlai khawvelah technology chu mihringte nunphungah a bet tawh hle a, hetiang a nih mek laia India-in khawvel hmuh theiha technology lama a hmasawnna phochhuahna hun ‘National Technology Day’ hman a nih thin chu a lawmawm hle a ni, a ti. Mizoramah pawh National Technology Day hi tum thum hman a ni tawh a; Science & Technology peng hrang hrang MISTIC, MIRSAC leh Science lam kaihhnawih pawl leh mimalte thahnemngaihna avangin vawiinah chuan Mizo mipuite hriatah technology lama an hnathawh leh hmasawnna hrang hrangte phochhuah a ni thei ta chu a lawmawm hle a ni, a ti bawk. Hmasawnna tak tak nei tur chuan technology tel lo chuan a hlawhtling theih tawh lo tih hria a, mipuite pawhin technology chhuak tharte lo hmelhriat a, tunlai hun danglam mil zel tuina an inher thiam ve zel a pawimawh a ni, a ti. Hmalam thlirna thui tak nena National Technology Day hmang turin duhsakna a hlan a ni.

Planning Secretary Dr.C.Vanlalramsanga pawhin thu sawiin kumin National Technology Day thupui chu ‘ Science & technology for a Sustainable Future’ a nih thu a tarlang a; technology khawvelah kan awm tawh avangin kan pawm thiam leh hman chin dan tawk hriat a pawimawh hle a ni, a ti. Chief Scientific Officer Dr.R.K.Lallianthanga’n Mizoram hmasawnna tura Science & Technology hnuaia technology hmasawnna hrang hrang a tarlang bawk.

Vawiin hun hmanah hian Mizoram atanga an thil siamchhuah neitu nihna ‘Patentee’ hmasa ber Pu Lalbiakzuala Ralte leh Pu Lalpiangliana Sailo te chawimawina hun hman a ni a, Khuallian Planning Minister Pu Lalsawta chuan Certificate leh lawmman sumfai a hlan nghal a ni. Science & Technology hnuaia MISTIC, MIRSAC leh Science Centre Governing Body leh Executive Body member te, Science & Technology hmasawn nana pawl hrang hrang - Mizoram Science Society (MSS), Science Teachers’ Association, Mizoram (STAM), Mizo Academy of Sciences (MAS), Mizoram Mathematics Society (MMS), Biodiversity and Nature Conservation Network (BIOCONE), Geological Society of Mizoram (GSM) leh sorkar technical department hrang hrang bakah Govt. KM leh Govt. Republic School-a Higher Secondary zirlai leh zirtirtute he hunah hian an tel a ni.

May ni 11 ‘National Technology Day’ hi kum 1998-a India-in ama kutchhuak technology khawvel hriata a phochhuah ni a ni a. Khatih hunlai khan khawvel hriatah India ram chu Nuclear siam thei ram a nih zia lantir nan Pokhran, Rajasthan-ah Nuclear hlawhtling takin a enchhin a, ‘Trisul’ Missile hlawhtling takin a enchhin bawk a. Thlawhtheihna ‘Hansa-3’ an vuah chu he mi ni tho hian hlawhtling takin a thlawh tir bawk a ni. Kum 1999 atang khan kum tin ram hmasawnna atana technology pawimawhna inhrilhhriatna leh inzirtirna hun atan he ni hi  hman ziah thin a ni.