Vawiin hi National Technology Day a nih angin Directorate of Science and Technology buatsaihin I & PR Auditorium-ah Pu Lalsawta, Minister, Planning Dept ( Science & Technology ) hovin a lawmna hman a ni.
He hun Mizorama hman a ni ve chu lawmawm a tih thu leh Technology lama rualawhna Mizo mipuite min neih tirtu anih ngei a beisei thu Khuallian Pu Lalsawta chuan sawiin, "Khawvel hi Technology lamah nasa takin kan intlansiak mek a, India ram State dangte mai nilovin khawvel umphaka lehpel thei turin kan tan a tul tiin he hun hmangtu kalkhawmte a fuih.
Science & Technologies hman tangkai avanga khawl thil siam chhuah tam tak te chu khawvela chengte nun tinuama ti awlsamtu leh tangkai tak an nih thu sawiin Minister chuan tunlaia mitin te hmelhriat Mobile Phone te hi technology in a khat tlat a, khawl thil te tak te te dahkhawm chuan hna ropui leh tangkai tak thawk in hmun hla tak taka mi te bia in thlalak te kan inthawn thei te hi a mak a, heng khawl thil tel lo chuan kan nitin nunphung pawh a buai pha thei hial tawh,he tah hian Science & Technology pawimawhzia leh tangkaina chu a hriat mai a ni, a ti.
Khuallian chuan Science & Technology avanga khawvel hmasawnna hrang hrang mihring ten kan hmuhchhuah chhoh dan a sawi rual in heng zawng zawng ah hian Pathian thil siam erawh hi chu a technology a sang lutuk a, mihring te hian kan hre ve tan dawn chauh zawk a ni. Siamtu awm lo chuan engmah a awm ngawt thei lo.Mihring te hi kan landan kan vun rawng leh kan hmel te hi a pawimawh ber lo, kan thluak hi a pawimawh zawk a,kan thluak ah hian enge kan dah a,enge kan thun belh tih hi a pawimawh tiin mihringa thiamna thuk dah belh zel hi hmasawnna bul anih hria in kan sorkar chuan Department of Science and Technology hmangin hma a la chho mek a, zirlai te pawh an future ngaihtuaha Science leh Mathematics zir hram hram se a duh thu Minister chuan a sawi bawk a ni.
Vawiin programme Dr. R.K. Lallianthanga, Chief Scientific Officer, Directorate of Science & Technology kaihhruai ah hian Dr. C. Vanlalramsanga, Secretary, Planning Dept. ( Science & Technology ) chuan Keynote Address sawiin he hun Mizorama hman a ni chu lawmawm a tih thu leh Mizoram chuan Technology peng hrang hangah hmasawnna tur kan la ngahzia sawiin hemi hun hmang tura Mizoram chhunga Technology lam zirlai leh an zirtirtu kalkhawmte chu tun aia tan la lehzual turin a fuih.
National Technology Day, hi India Sawrkar-in 11th May 1998-a khawvel pum nghawrnghing khawp a Nuclear ralthuam a enchhin hriatreng nan leh Technology lama India ram hmasawn zel a pawimawhzia hriatrengna ni ah puan a ni a. Pokran-II (Operation Shakti)-ah khan India ram chuan Nuclear ralthuam ram venhim nan a enchhin a ni mai lova, khawvel hriatah Nuclear Technology-ah a thiamna a lantir a ni.
National Technology Day pual hmanna inkhawmah hian Mizorama Technology lam zirna Institution hrang hrang, Mizoram University (MZU), National Institute of Technology (NIT), National Institute of Electronics and Information Technology (NIELIT), Women Polytechnics zirlaite'n hun an hmang theuh a, Prof. Lalit Kumar Singh, Dean, School of Engineering, Mizoram University chuan 'Technology - Vision for Mizoram" tih thupui hmangin presentation a pe bawk. Er. H. Lalsawmliana, Sr.Scientific Officer, Directorate of Science & Technology, chuan he hun hmanna a kal zawng zawngte chungah lawmthu a sawi.
