Vawiin chhun dar 12:30 khan UD&PA Minister Pu Zodintluanga hovin a office chamber-ah UD&PA leh PWD hotute’n Aizawl khawpui kawng peng thuam inpawhna zingzum lai thenkhat siam rem a, kawngpui zauh dan tur an sawi ho.
Hemi atana hma an lo lak tawh dante chu engineer-te’n an report a. Hna kalpui dan tur ruahmanna an siamte chu thlir ho va, pawm a ni. He’ng kawngpui zauh tur zingah hian Venghlui leh Republic kawng inpawhna (Pangi Junction) te, Ramhlun leh Chaltlang leh Edenthar kawng inpawhna (Bawngkawn Junction) leh, Chanmari West leh Vaivakawn kawng inpawhna (Hunthar Junction) te a tel a. Millenium Centre bul kawngpui zauh dan tur pawh ngaihtuah ni se, tih a ni. He’ng kawngpuite zauh nana a ruangam lo din tawh sa chu PWD, PHE leh P&E lamte’n inrawn tlangin estimate kimchang lo siam se, tih a ni bawk.
He hunah hian Zobawk-a State Sports Academy sak mek dinhmun pawh sawi ho a ni a. UD&PA Minister chuan he Academy sak nana 2nd installment sum hmuh sa hman zawh lohva la awm chu kumin September thla ral hma ngeia hnathawh tur hmabak awmte thawkin chak taka sum awm anga thawh theihte chu thawk zo turin PWD hotute leh contractor-te chu a chah. He sum awm sa hmang hian hna pawimawh hmasa a theih chen chen thawh ni se tiin, a 3rd installment a lo chhuah leh thuai theih nan hmalak ni se tiin an rel.
He meeting-ah hian UD&PA changtu Minister leh Parliamentary Secretary Pu Hmingdailova Khiangte, UD&PA Secretary Dr C. Vanlalramsanga, UD&PA Joint Secretary Pu Vanlalmawia, PWD Engineer-in-Chief Er Vanlaltluanga, PWD Chief Engineer (Buildings) Er Lalmuankima Henry bakah UD&PA leh PWD officer dangte an tel a ni.
