Vawiin hian Pu C. Ngunlianchunga, Minister of State for Printing & Stationery leh Lawngtlai West bialtu MLA ni bawk chuan a bial chhung khaw pathuma hmasawnna hna pawimawh tak tak thawh zawh pathum a hawng.

Pu C. Ngunlianchunga chuan tukin dar 10 khan Hlimzawl pan na Jeepable kawng thar, Backward Region Grant Fund sum Rs nuai 30 senga laih chu a hawng a, he kawng hi km 8 a thui niin Lawngtlai to Parva Road in M. Kawnpui khaw kianga Hmarluang lui a tan tlangna atanga chhimlama peng niin he peng atanga Hlimzawl hi km 8 a ni. He kawng thar hi kumin February thla maia laih zawh kha niin Hlimzawl mipuiten tangkai takin an hmang zui nghal a ni.

A hawnna inkhawmah thu sawiin Minister chuan khaw inlungrual tak inni tih ka hria a, chu chuan rah tha chhuahin lirthei tlawh pawh theihlohva awm thin kha vawiinah chuan kawng thar kan hawng thei ta a ni, a ti a, khaw mipuiten dil lo mahse thil tha tam tak sawrkarin a la rawn tih sak zel dawn cheu a ni, tiin khaw mipui pungkhawmte chu a hrilh a ni. Minister hian Hlimzawl thalaite tan Football, Valleball leh Volleyball net, Kohhran awmchhun LIKBK kohhran tan Solar Lamp, YLA tan Silpauline pahnih leh No Dozen 5, khawtlang hman atan Silpauline thahnem tak a pe a, kohhran leh khawtlangin a tul apianga a hman a tan Public Addressing System pakhat a pe bawk. Minister hi khawtlang mipuite hian khawdai atanga vantlang inkhawmna hmun thleng an zawn a, kawng thar lawm nan ruai buatsaihin bawng leh ran dang engemawzat an talh bawk a ni.

A hawnna inkhawm hi DRDA, Project Director Pu H. Dolianbuaia’n a kaihruaia, Addl. DC Pu R. Lalsangluaia’n thusawina hun a hmang bawk.

Hemi hnu hian Minister chuan Bolisora pan lehin LADC leh CADC area inkal pawhna tur, Tuichawng lui a BADP sum cheng nuai 35 senga sak Leihlawn thar a hawng leh nghal a, he lei hi a hnuaia Lawng kaltlang theih tura duan niin Bolisora leh Chhotaguisury inkar inkawlpawhna tur a ni. Pu C. Ngunlianchunga chuan, chhim lam lehzuala LADC area leh CADC Area a cheng mipuite intlawhpawh tawnna leh mamawh lakna kawng, tuilian vanga fur laia ping thin chu leihlawn thar a awm takah chuan kumtluana kaltlang theih a ni dawn ta a, hei hian helai bial vela mipuite sum, tha leh hun sen thin nasa takin a tihniam dawn a ni, a ti.

Bolisora leh Chhotaguisury inkar lei a hawn zawh hian Minister chuan Nghalimlui khua pan leh in, he khaw tana Backward Region Grant Fund sum cheng nuai 10 senga siam, km 5 zeta thui tuilak thar a hawng leh nghal a, Nghalimlui khawtlang mipuiten a puala an buatsaih zanriah a ei nghal bawk.

Pu C. Ngunlianchunga chuan, hun rei tak tui harsatna in a tihbuai Nghalimlui khua in tuilak thar a nei ta chu a lawmpui tak zet thu sawiin tha tak leh uluk taka enkawl zui turin khawtlang mipui a chah a, thianghlimna lamah te, faina lamahte hmasawn pui tur leh khawtlang hrisel leh thianghlim din tura beihpui thlakna hmanruaa hmang zui turin a chah a ni.

Pu. C. Ngunlianchunga’n Hlimzawl, Bolisoa leh Nghalimluia hmasawnna thar a hawnnaah hian Addl. DC Pu R. Lalsangluaia leh PD, DRDA Pu H. Dolianbuaia te bakah hian DVO Dr. Zonghinga, DIPRO Pu K. Saitluanga, leh LADC a EM leh MDC engemawzatin an tawiawm a ni.