“National Voters Day” 2013 chu vawiin Dt 25.1.2013 chawhma dar 11 : 00 khan DC’s Conference Hall, Saiha-ah “Greater Participation for Stronger Democracy” tih thupui hmangin hlawhtling taka hman a ni.
He Ni hmanna inkhawm hi Pu B.Lalchhawntluanga, Election Officer, Saiha chuan a kaihruaia, Pu Alok Swarup IAS, District Election Officer leh District Bawrhsap nibawk chu khuallian a ni. Pu N.Chakhai, ERO, 39-Saiha (ST) Assembly Constituency chuan he Ni hman anih chhan sawihawnna neiin BLO te leh Political Party hrang hrang te hnenah an tawiawmna avangin lawmthu a sawi a, Birth & Death Registrar te pawimawhna sawi langin Electoral Roll a mi kan thun luh chungchangah fimkhur a pawimawh zia a sawi a, India khua leh tui dik tak te chauh Electoral Roll ah hian thun luh tur a ni, a ti bawk. Khawvel ram thenkhata Vote an neih dan sawiin ram thenkhat ah chuan pawisa tam tak seng a Vote hi neih theih chauh anih thu a sawi bawk. India khua leh tui kan nihna anga hamthatna kan neih hlu tak mai chu Vote kan nei hi a ni, a ti bawk.
He Ni hmanna a Khuallian Pu Alok Swarup IAS, District Election Officer, Saiha leh District Bawrhsap nibawk chuan thu sawiin B.L.O. te inpekna chu ropui atih thu a sawi a, America President lo ni tawh Abraham Lincon chuan Democracy ram chu mipuite siam mipuite ta leh mipuite sawrkar anih thu a lo sawi tawh a, India ram pawh khawvela Democracy ram ropui tak a ni tiin ram hrang hrang a Democracy an kalpui dan leh an inthlan dan te a sawi lang bawk. Democracy sawrkar ah chuan mipuiten rorelna an chang lian ber ani tiin langtlang sawrkar din a pawimawh thu a sawi bawk.
Khuallian chuan ERO, AERO leh BLO zawng zawng te hnenah lawmthu sawiin an thawhrimna chu ropui atih thu leh fak an phu ani ati bawk. Khuallian hian B.L.O. hna thawk tha mi pathum thlan chhuah heng- H.Laldinthara, 39/28-Niawhtlang, MC Chhualai 40/1-Zero Point leh B. Rakhu, 40/40 Leisai Polling Boot ami te hnenah lawmpuina thuziak leh tangkafai Rs 1000/-theuh a hlan nghal a ni .
Pu Zothanmawia Khiangte SDC & AERO chuan Saiha khawpui chhung veng hrang hrang a Electoral Photo Identity Card (EPIC) nei thar mi 862 te hnenah EPIC hi a hlan nghal a ni
