Mizoram leilung hman dan behchhana Mizoram economy peng hrang hrang leh a leilung awmdan rawn zira lokal, University of Minnesota (UM) mithiam rual Prof Dr. Karlyn Eckman kaihhruaite chuan vawiin tlai khan Chief Minister Pu Lal Thanhawla chu a chenna bungalowah hmuin, an thil hmuhdana rawtna (recommendation) an siamte chu Chief Minister hnenah hian an hlan.

Mizorama an cham chhung hian UM mithiam te hian khaw hrang hrang 13 - Reiek, Khawrihnim, Sihphir, Lungdai, Thingsul Tlangnuam, Thingsulthliah, Serchhip, Zote, Lunglei, Mampui, Lawngtlai, Aibawk leh Parvatui te an tlawh a. Heng khua te a mipuite hnathawh dan te, an kalphungte, tlakchham an neihna lai leh an mamawh tur awmte thlithlaiin an zir a. Heng an zirna leh an hmuhdan te hi kawng hrang hrang, tui lakna leh a humhalhna ah te, agriculture, horticulture, soil, ran vulh leh leitha hmanah te, tlangram loneih (jhum), forests, agroforestry, industry lam kaihhnawih thiamna (enterprise development) leh marketing leh thiamna leh hriatna lam chherchhuah te an ni a, mamawh leh tul an tihah rawtna siamin, Chief Minister hnenah hian an hlan nghal a, UM leh Mizoram sorkar chu thawhdun theihna kawng zau tak a awm a ni an ti.

University of Minnesota team hian Mizoram University (MU) nen kawng tam takah thawhdunna thui tak awm thei nia an hmuh thu Chief Minister hi an hrilh bawk a. Mizoram hmasawnna tur hian Mizoram sorkar, University of Minnesota, Mizoram University leh Food and Agriculture Organisation (Delhi & Rome) thawhhona kawng a awm thu an tarlang bawk a ni.

Chief Minister chuan Mizoram economy dinhmun hrilhin, chak leh zuala hma a sawn theihna tura University of Minnesota mithiam rual ten Mizoram an rawn zir chu lawmthu a sawi a. UM mithiam te pawhin Mizoram sorkar-in phur tak leh lawm taka alo dawngsawng chu lawmthu an sawi ve bawk a ni.

Chief Minister hi Pu P.L.Thanga, Member Secretary, State Planning Board leh Pu Lalram Thanga, Principal Secretary to Chief Minister ten an tawiawm a. USA mithiam rual Karlyn Eckman, Dean Current, leh Michelle Schermann te hi Er. Chawnghnuna, Jt Secretary, PHE in a tawiawm a, an zinga Joe Magner erawh an ramah alo haw hman tawh a ni.