Kumin January ni 25 hian a tum hnihna atan National Voters Day chu Mizoramah hman a ni leh dawn a. He ni hman dan tur sawiho hian vawiin khan Chief Electoral Officer Pu K. Riachho IAS hovin a pisa-ah National Voters Day hmanna tura chanvo pawimawh chelhtu tur Department hrang hrang ai awh ten meeting an nei.

Election Commission of India chuan India khua leh tui kum 18 chin chunglam te Vote nei tura inziaklut theuh turin leh Vote thlak ngaihpawimawh nachang mipui ten a zau thei ang bera an hriat theihna turin kum kalta atang khan National Voters Day hi a hmang tan a. Mizoram sorkar pawhin ECI thupek ang hian State level-ah inkhawm urhsun tak buatsaihin District level-ah pawh DC te kaihhruaina hnuaiah a tum hnihna atan he ni hi ropui taka hman a tum a. State level-ah chuan Vanapa Hall-ah inkhawm hi buatsaih tum niin Mizoram Governor Pu Vakkom Purushothaman chu khuallian tura beisei a ni. Thalaite rilruah India khua leh tui an nih anga ram rorelna kalphunga inrawlh ve thei an nihzia leh he an mawhphurhna hi inchhuanna tham a ni tih hriaa India khua leh tui, a bik takin thalai te fuihna hun remchanga hman tum a ni.

National Voters Day denchhen hian Radio live phone in programme neih tum a ni a, Higher Secondary School hrang hrang tan Quiz competition buatsaih a ni bawk.