Vawiin chawhma dar 11:30 khan Mizoram-a Taekwando zirtira cham mek Master Lee Jeong Hee leh a nupui chuan Art & Culture Minister Pu PC Zoram Sangliana chu a office-ah an kawm a; Mizoram Amateur Taekwando Association (MATA) hruaituten Master Lee Jeong Hee hi an tawiawm a ni.
Master Lee Jeong Hee chuan Mizoram chu nuam an ti nupa hle tih thu sawiin, anmahni dawngsawngtute leh sawrkar chungah lawmthu a sawi a. Taekwando chu Korea hnam ziarang pakhat a nih thu Minister chu hrilhin, Mizoram thalaiten nasa taka an lo tuipui leh an thiam bel chu thil lawmawm leh phurpuiawm a nih thu a sawi a. Mizoram hian Taekwando Hall hranpa a neih hunah nasa lehzuala hmasawnna hmuh theih ngei a beisei thu pawh a sawi bawk.Pu P.C. Zoram Sangliana pawhin Mizote leh Korean te chu Mongolian thlah khat an nih avanga ramdang mi tam takte aia inpawh bik nia a hriat thu sawiin, Korea thalaite nena cultural exchange neih a nih theihna tura thawhpuiah Master Lee chu a sawm a. Mizo thalaite chu infiamna ngau ngauvah pawh inmal-beih (contact sports) lamah an duai loh thu hrilhin, Mizo thalaite huaisenzia leh chak duhna rilru lian tak pu an nih thu a sawi a ni. Art & Culture Minister Pu P.C. Zoram Sangliana chuan South Korea thalaite leh Mizo thalaiten intlawhpawh tawnna hun an neih theihna tur kawng dapa thla thara South Korea Ambassador hmuh a duh thu a sawi chungchangah Master Lee hian ruahmanna lo siamsak a tiam a ni.
Master Lee Jeong Hee hi Embassy of the Republic of Korea, New Delhi-ah General Sports Manager a ni a; Taekwando-ah hian 6th Dan Black Belt a ni. Master Lee Jeong Hee hian Pu P.C. Zoram Sangliana chu Kukkiwon Member nihna hlanin, an pawl chhinchiahna badge a beltir nghal bawk. Nimin tlai khan Master Lee Jeong Hee hian infiamna tihhmasawnna kawnga mi thawhhlawk leh Taekwando a lo darhzau lehzualna atana mi tangkai tura an ngaih khawvel hmun hrang hranga mi langsarte hnena an lo pek thin Black Belt Ist Dan (Honorary) chu Master Lee Jeong Hee hian Chief Minister Pu Lal Thanhawla hnenah a hlan a. He a hminga Black Belt Ist Dan nihna hi Kukkiwon, World Taekwando Federation (WTF) hmunpui Seoul, South Korea chuan Embassy of the Republic of Korea kaltlangin Chief Minister Pu Lal Thanhawla hi an rawn pe a ni. Hetiang nihna hi India ramah chuan filmstar Shah Rukh Khan hnenah hlan a lo ni tawh bawk.
