Vawiin khan National Wildlife Week vawi 59-na kharna programme chu Assembly Annexe Conference Hall, Aizawl ah neih a ni a, he hun ah hian Prof. R.Lalthantluanga, Vice Chancellor, MZU chuan khuallian niin a hmanpui. Khuallian hian nungcha humhalh inzirtirna hi khawpuia kal pui a that rual rualin nungcha tamna zawk thingtlang lamah in zirtirna hi pek uar nise a ti. National Wildlife Week kharna programme hi Pu Rosiama Vanchhong, Principal Chief Conservator of Forets (PCCF)-in kaihruaiin Pu Lalrinmawia, Conservator of Forests (Wildlife)-in Mizorama he hapta hman dan chipchiar takin a sawi bawk.
Hapta hman dan Report tarlanna hian tun dinhmun a Mizoram hmun hrang hranga Wildife Santuary siam thar leh siam belhna atana Department in hma an lakna chi hrang hrangte, Aizawl Zoological Park-a captive breeding programme chungchang te, MZU atanga mithiamten Mizoram chhunga research an beih mekna report tlangpui te sawi lan a niin Aizawl sahuan chungchangah documentary film siam chu chhuah a ni bawk.
He hunah hian he hapta denchhena poster competition buatsaih a lawmman latu -1st Zohlupuii, CI-XII, St.Pauls HSS; 2nd Lalrempuia, CI-XI, Govt. KM HSS leh 3rd VL Rinsanga Ralte, Cl-XI, Govt. Chaltlang HSS hnenah khuallian hian lawmman tangka fai leh certificate pe in midang panga hnenah consolation prize a hlan bawk. He hunah hian Department-in ‘Butterflies of Mizoram’ tih lehkhabu an buatsaih chu an tlangzarh nghal.
He huna thusawitu Pu K.Lianthanga, Hon.Wildlife Warden, Aizawl District chuan Sihphir tlak lama a ram enkawl mek Bigha 170 vela zau ah hian nungcha leh ramhmul species chi hrang hrang tamtak a awmthu sawiin a huanah hian Zawhte leh Sazu in a rualin chaw an kil ho thin a ti a, he hmun hi Keipui pawhin kum khat ah vawi li/vawi nga a tlawh thin thu a sawi.
