Kumin Republic Day lawmna pui ber New Delhi-a neiha ramchhung naupang huaisen chawimawi zinga Jeevan Raksha Padhak Award dawngtu Lalrinhlua (13) s/o V.Lalramlawma, Sakawrdai chu vawiin khan Sports & Youth Services Minister Pu Zodintluanga’n a office-ah lawmpuina thingpui inpuiin lawmman cheng 5000 a hlan ve a. He naupang huaisen, New Delhi-a chawimawina zuk dawng hi nimina Lengpui Airport a lo thlenin anmahni bialtu MLA leh Deputy Chief Whip Pu RL Pianmawia chuan thlawhtheihna tumhmunah a lo hmuak a ni.

Vawiina an hun hmanah Minister chuan Mizoram leh Mizo hnam chawimawitu naupang te nih lai atanga thian chhan thih ngam nun a lantir chu fakawm a tih thu a sawi.

Kum 2011, August ni 17 khan Lalrinhlua leh a thian naupang 30 rual vel chuan Sakawrdai tuikhuahah tui an chengho a. An tuicheng zo, tuikhuah kama an chawlh lai chuan an zinga mi Lalmuanzova, kum 9 mi chu a tel velo tih an hrechhuak a. Lalrinhlua chu tuikhuah, feet 15 zeta thukah chuan zuanglutin Lalmuanzova hi vaukamah a pawt chhuak a. Nikhawhrelo leh khawng vek tawh a nih laiin Lalrinhlua chuan an zirlaibu-a tuitla chhan dan leh thawktir dan (artificial respiration) chu hrechhuakin tuitla kaah hamin leh a dul thuar te nemin Lalmuanzova nun hi a chhanhim ta a ni.