Vawiin khan Lunglei DC Pi K.Lalrinzuali kaihhruaiin a office chamber-ah naupangte venhim leh an dikna chanvo humhalhna kawnga chak zawka hmalak dan tur ngaihtuah turin meeting neih a ni. He meeting-ah hian Lunglei SP Pu C. Lalthanmawia, School Education Department hotute, Lunglei DC Official-te, I&PR leh Lunglei MJA te an tel a ni.

Pi K. Lalrinzuali chuan tun hnai maia thil thleng Thualthu khuaa hmeichhe naupang kum 7 mi lek hruaibo anih kha pawi a tih thu leh chanchin a hriat veleh official dangte nen a hmuna an va kal thu a sawi a. Naupang bo chu hmuh let leh niin Thualthu khua him leh dam taka thlenpui a ni chu lawmawm a tih thu a sawi bawk. Tunlai khawvel sualna lo pung zelah fimkhur lehzual a tul takzet a ni tiin khawvel hmun danga naupang laka suahsualna ang chi pawh Mizoramah kan la hmachhawn ve zel dawn a, chutiang laka kan hima, kan inven thiam theih nan tun aia nasa zawk a naupangte humhalhna kawngah tan kan lak leh zual a ngai a ni, a ti. Naupangte an lo him zawk theihna tur leh an dikna chanvo humhalhna turin hemi chungchanga Dan awmte Juvenile Justice Act, 2015, POCSO Act, 2012   leh Dan dangte kan inzir a tul a ni, a ti bawk.

School Education Department kaltlangin naupangte dikna chanvo chungchanga naupangte leh mipui mimir hriattur pawimawh inzirtirna Awareness Campaign buatsaih thuai vawiin meeting chuan a rel a. He inzirtirna hi Lunglei District huam chhung khaw tinah neih ni se tih rel niin naupangte bakah nu leh pa te koh khawm an ni ang. Hemi bakah hian Lunglei town area school thlanchhuah ah te Official te insemdarhin inzirtirna hun hman a ni bawk ang. School Management Committee leh School Management & Development Committee te nen tangkawpin he hmalakna hi kalpui a ni ang. Mass media hmanga awareness thehdarh zel a nih theih nan Radio hmanga thusawina hun buatsaih a ni bawk ang.   

Attachment

  • Loading attachment...