Mizoramah hmasawnna chak zawka a kal theihna tura Sawrkar flagship programme New Economic Development Policy (NEDP) hnuaia hmalakna peng pakhat Entrepreneurship Development Scheme (EDS) kaltlangin ni hnih chhung awh tur (May 31^st – June 1^st 2018) Mizoram pum huap NEDP Entrepreneurship Conclave 2018 chu Lungleiah nghah a ni dawn. He Conclave hi High Powered Committee (HPC), Lunglei leh Mizoram State Entrepreneurship Development Monitoring Committee (MEDMOC) tangkawp ten an buatsaih ang. 

Hemi chungchang sawiho tur hian nimin khan Chief Planning Officer, HPC leh Member Secretary, MEDMOC ni bawk Dr Lalrinchhana hovin a Office Chamber-ah meeting neih a ni. He meeting-ah hian Lunglei District Education Officer, District Research Officer leh DIPRO te bakah khawpui chhunga zirna in hrang hrang hotute an tel kim hle. 

Dr Lalrinchhana chuan Entrepreneurship Development Scheme (EDS) hnuaia an hmalakna tlangpui sawifiahin mizo thalaite sumdawnna bultan tum te tan nikum atang khan ‘Business Plan Contest’ (Mizoram Kailawn) hlawhtling taka kalpui a nih thu a sawi a. Mizoram Kailawn hmalakna ah hian ramchhunga zirna in hlun berte zinga mi IIM Calcutta- Innovation Park te nen thawkhoin Entrepreneurship lama tui thalaite tan kawng an hawn sak mek bakah an bul tanna tur thlengin an ngaihtuahsak thu a sawi a. Mahni kutke a ding thei tura hmalaa intihsiakna 'Micro Start-up Competition' titha thlanchhuah mi 35-te hnenah tanpuina an pek tawh thu a tarlang bawk. Ram hmasawnna chak taka kalpui tur chuan mahni kut ke ngeia eizawnna kawng dap thiam ‘entrepreneurs’ thahnem tak kan neih a tul a ni tiin thalai tam zawk ten mahni kutkawiha eizawnna kawng an zawh theih nan NEDP Entrepreneurship Conclave 2018 chu buatsaih a ni dawn a ni, a ti. 

NEDP Entrepreneurship Conclave 2018 chu sumdawnna bul tan tum te, sumdawnna lian zawka kalpui duh te, sumdawnna chungchanga zawhna nei te, sumdawnna bul tan duh si, bul tanna nei lo te leh business idea tha tak a taka chan tir duh te tan ruahman a ni a.  Mahni kut kea din tum te kawng kawhhmuh tur leh an mamawh hrang hrang te zirchianga entrepreneuship chungchang inhrilhhriat chu he Conclave-in a tum ber a ni. Conclave-ah hian Stall thahnem tak buatsaih a ni dawn a, 'Micro Start-up Competition' titha thlanchhuah mi 35-ten an thil siam an phochhuak ang. Hemi bakah hian Lunglei khawpui chhunga Bank hrang hrang manager-te leh Entrepreneuship lama mithiam rual Master Trainer-te an rawn tel dawn a, entrepreneurship lama hriat duh apiang an zawh theih bawk ang. NEDP Entrepreneurship Conclave 2018 hi May 31^st leh June 1^st, 2018 ah Convention Centre, Lungleia neih tum a ni. 

Meeting-ah hian zirna in hrang hranga Entrepreneuship Knowledge Centre din chungchang  leh Entrepreneushi Awareness campaign neih dan tur sawiho a ni bawk.