NEDP sum hmanga Tourism Department Rural Home Stay Scheme hnuai Dungtlang leh Vangchhiaa mikhual thlenna tur siam mêkte NEDP Press Tour-a tuipuiral tlangdung fang mêk Kolasib leh Mamit District MJA te'n vawiin khan an tlawh.

Rural Home Stay Scheme hnuaiah hian mikhual thlenna room siam turin Dungtlang atangin chhungkaw 5 leh Vangchhia atangin chhungkaw 5 thlan an ni a. Mikhual room siam nan hian Rs 2 lakhs (Nuai 2) theuh pek niin heng an room siamah hian khum 2 leh Toilet, European-type Commode dah a ni a. Rural Home Stay Scheme dawngtu thenkhat chuan mikhual riah theihin an peih fel tawh a, la siam kal mêk an awm bawk.

NEDP Press Tour-ah hian Mamit District IPRO Pu Paul Rokima leh Kolasib District IPRO Pu Collin Hlychho te kaihhruaina hnuaiah MJA member 12 ve ve an tel a, Tukin khan Mizo Hlakungpui Mual Robawm leh Khawbung Branch YMA Museum an tlawh a, Cheng Nuai 368.89 hmanga siam mêk Khawbung Mini-Sports Complex an tlawh bawk. Khawbung Mini-Sports Complex-ah hian Khawbung khawtlang hruaitute'n an lo dawngsawng a. Mini Sports Complex hnathawh kal mekah a enkawltu RD Department ten an tlawh khat avangin hnathawh a chak lo niin an sawi a, Khelmual chhuat lei laih hniam tur meter 1 chuang chu lai zo loin khel mual zau zawng tur a tlin avangin an duhtâwk a. Hemi laihna ang-hu sum chu thil danga hman theih turin Department lam chuan an sawi a. Chutih laiin he sum hmanna tur ruahmanna fel tak khawtlang hruaitute hnenah Department lamin an sawi theih loh avangin ruahmanna fel tak siam thuai se an duhthu MJA member Press tour-a kalte hi an hrilh.