Nehru Yuva Kendra, Ministry of Youth Affairs & Sports, GOI leh Mizoram Youth Club (MYC) tangkawpin vawiin khan Aizawl Press Club-ah Nehru Yuva Kendra din champha phak ni lawm a ni a, Mizoram Chief Secretary Pu Vanhela Pachuau chu Khuallian a ni. Vawiin NYK Foundation Day lawmna-ah hian MYC member-te bakah Mizorama hnamdangte intelkhawmna pawl hrang hrang Bhojpuri Kalyan Samiti, Hindustan Club, Mizoram Gorkha Youth Association leh Assam Cultural Society aiawhin engemawzat an tel ve a ni.

 

 

Khuallian Pu Vanhela Pachuau chuan thu sawiin Mizote leh Mizorama awm hnamdangte inkarah inhriatthiamna thuk leh rilru zau zawk put tawn a tul a ni, a ti a. Mizoten hnamdangte lakah dawhtheina lantir a pawimawh ang bawkin hnamdangte pawhin Mizote nunphung mila awm tulchang a awm thin tih sawiin Chief Secretary chuan inhriatthiamna thinlung chuan inghirnghona leh tharum thawhna thlengin a dodal thei a ni, a ti. Mizoram Youth Club-in inpumkhatna lam hawizawnga cultural exchange programme te, mobile concert te, infiamna chi hrang hrang, fashion show leh AIDS awareness programme a buatsaih thin chuan Mizo leh hnamdangte inkara laichinna atan hmasawnna leh hlim taka inkawm hona hun tha tak a siam phah thin avangin an hmalak nate a fak bawk.

Chief Secretary chuan NYK Foundation Day puala lawmman District Youth Club Award chu Mizoram Youth Club hnenah leh District Youth Award 2 chu N. Samuel, Bawngkawn leh C.Lalthanchuangi, Vaivakawn Zohnuai hnenah a hlan nghal a ni.