Neonatalogy,Obstetrics & GynaecologyBuilding, Aizawl Civil Hospital ami chu vawiin khan Health Minister, Pu Lalrinliana Sailo chuan a hawng.
He building hawnna inkhawm Pi Esther Lal Ruatkimi, Secretary, Health & Family Welfare Dept. kaihhruaiah hian Minister chuan he building hi harsatna tam tak karah sak anih thu sawiin, hmalatute zawng zawng chungah lawmthu a sawi a. Tuna Gynaecology ward chu a thianghlim tawk loh avanga harsatna neuh neuh a awm thin thu sawiin, hei vang hian a thawktute thahnem ngaihna avangin building hi sak zawh chiah nilo mah se, hawn a ngaih thu a sawi a. Hawn anih hnuah pawh a cheibawl hna chhunzawm zel a ni ang a; building hawn a nih tak avang hian “Utilisation Certificate” sorkar laipui lamah thawn thlak a ni thei dawn ta a, hei vang hian a tihchangtlunna tur sum hmuh belh tur la awm te kan hmuh theih phah dawn a ni, a ti. Doctor tam takin sorkara luh an duh loh avangin sorkarin doctor a ngah lo va, indaihlohna a na hle a ni tiin, tuna district danga doctor dah tur a ngenna te pawh tihhlawhtling turin sorkarin theihtawp a chhuah thu a sawi.
He building sak nan hian Cheng vbc 6.25 ruahman a ni a, Building zau zawng hi 3353.76 sqm niin, khum 77 hun theihna tura tih a ni a; Labour room, Post Natal Ward (Khum 11), waiting room, mother’s room, Maternity Ward (khum 8), Gynae OPD (khum 2), Emergency OT, Post Operation Ward (khum 12), Cabin 3, Doctor leh Nurse Room te bakah room dang tam tak a awm a ni.
