No.1385/2021-2022

Hnahthial the 14th July, 2021 - North East Transmission Company (NETC) Ltd. ten Corporate Social Responsiblity (CSR) atanga Tarpho Branch YMA hnena Ambulance an pek chu nimin khan Zoom Meeting hmangin inhlanna hun hman niin Hnahthial District Bawrhsap Pu H.Dolianbuaia chuan a hlan a ni.

He hun hi DC's Conference Hall Hnahthial-ah neih niin Pu Lalremruata Sailo, SDO (Sadar) chuan kaihruaiin CSR tanpuina dil chhuaktu Dr. Lalzirmawia Chhangte IAS, Secretary Government of Mizoram leh Pu Anil R.Sah DGM, NETC Ltd leh chuan Video Conferencing-in an hmanpui a ni.

Dr.Lalzirmawia Chhangte IAS chuan P&E Department Secretary anih laia OTPC hotu Pu Satyajit Ganguly hnenah CSR kaltlanga tanpuina ngenna a siam thu sawiin “NETC lamah hian ruahmanna min siam sakin a taka bawhzuitu chu Hnahthial DC Office an ni a, tuna alo puitling thei ta leh ka pianna khua Tarpho mipuiten thil tha an dawng thei tur hi ka lawm hle a ni" tiin khawtlang hmasawnna leh changkan nan zirna uar turin leh hriselna ngai pawimawh turin Tarpho khua chu a chah bakah Sawrkar Official te thawhpui thiam tur ten a fuih a, Covid-19 hripui laka an him theih nan Sawrkar-in tih tur leh tih loh tur a tih te chu tha zawm turin a ngen bawk a ni.

Dr.Lalzirmawia Chhangte hi Pi K.Lalrinzuali, IAS, Secretary, Government of Mizoram leh Grace Lalremruatfeli, Advocate ten an tawiawm a ni.

NETC hotu Pu Anil R. Sah pawhin mipui vantlang tan CSR atanga an luanchhuah thin thu sawiin tuna Ambulance an pek pawh mipui ten tangkai leh tha taka an chhawr an beisei thu an sawi a ni

Tarpho Branch YMA hnena Ambulance hlan hi Maruti Eeco niin Rs. 6,17,376 sen a ni a, Tarpho Branch YMA President Pu Lalramsanga leh Pi Saizikpuii Addl DC te chuan lawmthu sawiin Pu F. Zosangliana President MJA chuan a vialiam a ni.