Vawiin chawhma 10:00 khan MYA Hall, New Siaha-ah New Economic Development Policy hnuaiah Entrepreneurship Awareness cum Training Programme neih a ni.

He Awareness cum Training Programme hi Pu N. Chakhai, Additional Deputy Commissioner, Siaha District, Siaha chuan a kaihruai a, Pu Zothankhuma, Commissioner & Secretary, Commerce & Industries leh Member, MEDMOC nibawk chuan khuallian niin he hun hi a hmanpui a ni.

Khuallian Pu Zothankhuma chuan thu sawiin, hetiang hun tha Siaha a kan hman thei hi a lawmawm hle a ni tiin Mizoram hi sumdawnna lamah kan la pachhe hle a, Kut hnathawktute thawhchhuah, a hralhchhuahna lama harsatna an tawh thin te hi Sawrkar in a hria a, chu harsatna kuthnathawktuten an tawh thin sutkian nan te, hlawk zawka kan tharchhuah theina tur te leh a hralhchhuahna lama harsatna kan tawh thinte chu he NEDP Scheme ah hi chuan a awm tawh lo tura ngaih a ni, a ti a. He NEDP hi Scheme tha tak ni mahse a hlawhtlinna chu keini mipui ah a innghat a ni tiin eizawnna ngialnghet leh rintlak neih tur chuan ngaituahna thar neih thiamte, thilthar hmuchhuah thiamte leh chumi tihhlawtling tura tanlak dan thiamte a pawimawh hle a ni, a ti a. Kan hnathawhna-ah hlawhtlin ngei tum theuh tur leh mipuite tana entawntlak ni theuh turin kalkhawmte chu a chah bawk a ni.

Vawiin programme ah hian Resource Person Pu Lalrinzuala, UNDP Expert Member, MEDMOC, Aizawl chuan kalkhawmte Training a pek bakah zawhna leh chhanna hun te pawh hman a ni bawk.

Vawiin NEDP hnuaia Awareness Programme hmanna ah hian Siaha khawpui a kuthnathawka eizawngtute, Department hrang hrang a Head of Office te, Tlawmngai Pawl hrang hrang hruaitute leh Chanchinbumite an tel kim hle a ni. Pi Marilyn Rualzakhumthangi, SDO(S) leh Nodal Officer, NLUP, Siaha chuan lawmthu sawina in he hun hi a ti tawp a ni.