Sorkar laipuiin New Education Policy a kalpui tur chungchangah nimin khan Govt. Champhai College Seminar Hall-ah Consultation meeting neih a ni a. He meeting hi Pu Lalnunmawia, Govt. Champhai College Principal chuan a kaihhruai a, Govt.Champhai college, Govt.Khawzawl College leh Govt.GM Higher Secondary School atanga zirtirtu thlan bikte chuan New Education Policy atana thupui chhawp chhuah chungchangah hian sawihona an nei a ni.

Meeting kaihhruaitu Govt. Champhai College Principal chuan New Education Policy chungchang hi sawizauvin, kum 1986 khan sorkar laipuiin National Policy on Education mumal tak a duang chhuak a, kum 1992- khan engemaw chen tihdanglam a nih hnuah tun thlenga hman zui a ni a. Hun lo kal zelah thil tam tak a inthlak a, Education policy thar duan chhuah a lo tul ta a ni, a ti a, Mipuite hnenah zirna kalphung tha, thil thar hmu chhuak tura zir bingna kalphung tha te bakah, India ram hi hriatna leh thiamnaa mite chunga leng a nih theihna turin zirlaite hnenah zirna an mamawh pek a tul a. Science leh technology leh zirna in bakah, thil siamna hmuna thawktu indaihlohna phuhruk a nih ngei theihna turin New Education Policy tha tak duang tura hmalak a ni, tih sawiin, tun hma chuan Education Policy hi dinhmun sang zawk atanga relin, a bawhzuina chu dinhmun hniam zawk ten an ngaihtuah velah thin a. Tun tumah erawh chuan dinhmun hniam zawka miten relin, a bawhzui dan tur chu dinhmun sang zawkah ngaihtuah a ni ang, tiin a sawi a ni.

New Education Policy hnuaiah hian sawiho tur thupui 33 chhawp chhuah a ni a, heng zinga 13 hi School Education hnuaiah sawiho niin, a dang 20 chu Higher & Technical Education hnuaiah sawiho a ni thung a, vawiin khan heng thupui thlan chhuahte hi zirtirtu kalkhawmte hian an sawiho a ni. Thupui an sawihote hi National Informatics Centre-ah State Information Officer te nena tangrualin website pakhat, MyGov.in kaltlangin dahluh a ni dawn a, State hrang hrangah zone meetinghmun rukah neih leh tur niin, chumi hnuah chuan National Level Meeting neih leh a ni ang a, kumin December thlaah chuan New Education Policy hi zawhfel theih beisei a ni.