Vawiin chawhnu dar 2:30 PM khan Pu Joseph Lalhimpuia, Parliamentary Secretary, School Education Department chuan Pune ah Fresher’s Day a hmanpui a. Mizoram literacy rate tla hniam ta chungchang sawiin, Chakma area leh Lawngtlaiahte tan lain India-ah pakhatna dinhmun luah leh ngei an tum thu a sawi.

Literacy rate san chungchang sawi zauvin, ziak leh chhiar thiam satliah tamna State ni mai lovin, Mizoram-ah quality education kan neih a, competitive spirit tha kan neih a pawimawh thu Pu Joseph Lalhimpuia chuan a sawi a. Hna a vang tawh hle a, mi taima tan lo chuan hna tha hmuh pawh a har tawh hle a ni tih hriain tan la nasa lehzual turin zirlaite a fuih a. UPSC-ah pawh Mizo thalaite an lang khat hle a, zirlaiten hemi kawnga tan lak a ngaih nasatzia Parliamentary Secretary chuan a sawi bawk.

Pu Joseph Lalhimpuia chuan Mizoram sorkar hnathawkte zingah mi tha tak tak awm teuh mahse, tam tak zawmthaw leh hna thiam lo an tam a, thangthar-te rilru thar nen mi thar, mi thiam leh mi taima mamawh a ni a, chutiang tuara inbuatsaih turin zirlaite a chah a. Education lam tichangtlung turin sorkarin hma theihtawpa a lak thu sawiin Institute for Human Development, New Delhi in a zir chhianna ah chuan India ram pum teacher availability index 0.38 a nih laiin Mizoramah chuan 26.2 a ni a, All India Enrolment Index 73.5% a nih laiin Mizoram-ah chuan 96.5% niin All India Educational Achievement Index 76.1 a nih laiin Mizoramah 89.4 a ni, a ti. SSA te leh RMSA, RUSA, SPA, NEC, NLCPR leh a dangte hmangin India ram leh state dangte Mizoramin a phak lohna thenkhatah hma lak mek a nih thu a sawi bawk.

Parliamentary Secretary hian Pune Mizo Students’ Union chu Rs. 15,000 a pe a. Mizo incheina chawikan a nih zel theihna turin Mizo Hnam incheina a pe bawk.

Pu Joseph Lalhimpuia hian naktuk ni 27/08/2015 ah hian Lavasa Smart City a tlawh ang a, Delhi lamah tlangin Sorkar office pawimawh thenkhat a tlawh bawk ang.