Mizoram Sawrkar chuan Sawrkar hnathawk nghet ni lo, Pension Scheme la nei ve ngailote tan New Pension System for Unorganized Employees & Workers (NPS – LITE) – 2010 a siam chhuak thar a. Hemi chungchang puanzarna leh inzirtirna hun chu Finance Minister Pu H.Liansailova hovin vawiin khan Finance Department ten an buatsaih a. Mizoram Legislative Assembly Conference Hall-ah hemi Scheme tihpuitlinna atana mi pawimawh leh a hmang tur awm mite sawmkhawm in Workshop pawimawh tak neih a ni.

Pu H.Liansailova chuan hetianga sawrkar hnathawk nghet ni velo tana pension hamthatna chhenfakawm tak sawrkar laipui ruahman anga Mizoramin a buatsaih chu thil lawmawm tak a ni tiin a khawihtu tur mi hrang hrang te pawhin uluk taka zirchiang turin a chah a ni. He Scheme hian Pension leh GP Fund facilities nei lo hnathawktu tam tak tan hamthatna a siam ngei a beisei thusawiin, a hmang thei si, a chinchang la hre loten an hriatchian a, an hman tangkai theih turin Workshop hi buatsaih a nih thu a sawi bawk a ni.

He Pension Scheme – NPS LITE hnuaiah hian Contract, Muster Roll, Deficit School/College leh Autonomous Bodies, Boards, Authorities hnuaia thawk mek, Pension Scheme la nei ngailote tan thlatin hlawh atanga Pension sum tur mahni duhzat thawha pek theih a ni tawh ang a. A ruaituten a do letna sum an pek a ngai lovang. Sawrkar Laipuiin he Scheme zarzo tute chu kum 4 chhung, kum tin Rs. 1,000 zelin a thawh sak ve thin ang. He sum hi Pension Fund Regulatory & Development Authority (IRDA) in an enkawl ang a. A khawih tura ruat bik Bank te leh IRDA Insurance Company te chu mawhphurtu leh a sum enkawltu ber an ni bawk ang. Sum tling khawmte hi a enkawltu ten a hlawk theih dan ber dapin an tihpun sak ang a. Zarzo tuten an sum dahna tur an thlang thei bawk ang.

Workshop hi Finance Secretary Pu Lalthansanga’n a kaihruaia, Chief Controller of Accounts Pu Lalropara chuan keynote address pe in, Secretary Finance Deptt.(E) Pu Vanlalnghaka chuan NPS-LITE chungchanga presentation a nei a, zawhna leh chhana hun hman a ni bawk.

Mizoram Sawrkar hnuaiah Pension leh Family Pension la mek mi 15,877 an awm a. Heng pension sum atan hian kum 2011-2012 chhungin cheng vaibelchhe 272.80 Budget-ah dah a ni.

Hre chiang duh tan Mizoram Sawrkar Finance Department (APF) leh Chief Controller of Accounts hnenah zawhfiah theih a ni.