Vawiin chhun khan Kolasib-ah Transport Minister Pu PC Zoramsangliana chuan a duh leh mamawh apiang tena India ram hmun hrang hranga tlan Rel Ticket an lak theihna tur Computerised Railway Ticket Booking Office (passenger reservation system) a hawng.

Hawnna thu sawiin Pu PC. Zoramsangliana chuan, Railway Out Agency Kolasib-a hawn tak chu Kolasib tana mellung pawimawh tak a ni, a ti a. Hei hian khualzin te tan awlsamna nasa tak a siam dawn a, hmun dang pan ngai lovin mahni kawtkai ngeiah rel ticket a lak theih tawh dawn ta a ni, a ti. Kolasib bial tan hian hmasawnna tamtak tun Ministry chhung hian a thleng ta a, ala thlen belh zel dawn bawk a. Kan sawrkar hian mi retheite tana chanvo tamtak pek hi a tum ber a ni fo reng a ni, a ti a. Inthlan dawna kan Manifesto kha en let thin ula, tah chuan kan tihtur kan la tihloh a awm chuan min chhal ang che u, a ti a. Tihtur ti lo zui tlak loh kan nih chuan min zui reng hi in ba lo ang bawkin tihtur ti, kan thiltiha innghahna tlak in hmuhah erawh chuan min zui hi in ba thung a ni, Pu Ramsanga chuan a ti a ni.

Minister chuan tunlaiin engkim a tak fiah theihna khawvelah kan cheng tawh a. thu diklo leh bumna atthlak tak tak hmanga insawichhiatnain hmun a chang tawh lova. Kawng engkimah Kristian tih atan a mawi em tih inzawt thin ang u, a ti a ni.

Vawiina Computerised Railway Ticket Booking Office hawnna inkhawm hi Pu H. Darzika, Secretary Transport chuan a kaihruai a. Pu LT. Zodinliana, Station Supdt, (ROA), Pu Zairemmawia, Addl. DC,Kolasib , Lumding leh Badarpur atanga lo kal North East Frontier Railway hotute leh Kolasib Hmar Veng VCP ten thu an sai bawk. Railway Out Agency a hawn zawh hian Pu PC Zoramsangliana chuan Silchar- Badarpur inkar Rel a chuanna tur ticket book-in heta rel ticket la hmasa ber a nit a a, a zawhah hian Pu H. Darzika, Secretary pawhin a book ve nghal a ni.

Rel ticket hi ni 120 hmalam tan a book lawk theih dawn a. Kum upa leh Cancer vei te tan leh rual ban lote tan concession a awm bakah naupang kum 5 hnuailam tan free a ni. Minister hi a nupui Pi Lalthlamuanin a tawiawm a ni.