252/2025-2026

Dated Aizawl the 22nd April, 2025 : Rivca Lalnunsangi d/o Lalchhandami Khiangte, Zotlang leh Jonathan VL Remruata, s/o Masthangi, Khawzawl te chu North East Zone Cultural Centre (NEZCC) buatsaih Young Talented Artiste Award 2022-2023 atan Mizoram atanga dawng tura thlan an ni. Rivca Lalnunsangi hian Creative Arts (Painting) category ah award dawngin, Jonathan VL Remruata hian painting category ah a dawng bawk a ni.

North East Zone Cultural Centre (NEZCC) hi Ministry of Culture, Government of India nena thawkho an ni a. Young Talented Artiste Award hi kum 2002 atanga sem tan niin, northeast state pariat atanga artist te tana buatsaih a ni. He award hian northeast state hrang hranga kan folk art hrang hrang leh material culture a bo mai loh nana an buatsaih a ni a. He award hian pawisa fai Rs. 20,000 leh citation a kengtel a, award dawngtu te tan zinna leh thlenna an tumsak bawk a ni.

Young Talented Artiste Award hi India mi, northeast state pariat zinga piang, kum 18 atanga kum 30 inkar tan a dil theih a. Folk art hrang hrang heng- lemziah (painting), lem tuk (sculpture), hnang tah (weaving/ carving), thing hmanga lem tuk (wood carving), hnam lam (folk dance), hnam zai (folk song), hnam rimawi tum thiam (folk musician) etc. te tan a dil theih a ni. Art & Culture department hnuaiah emaw mimal anga dil theih niin, artist te kuthnu thlalak mai bakah, an bio-data felfai tak leh an practice video thehluh tel a ni.

Young Talented Artiste Award 2022-2023 hi heng northeast state hrang hrang-Arunachal Pradesh, Assam, Manipur, Mizoram, Nagaland, leh Tripura atangin artist sawmpasarih (17) in an dawng a. Application 2022-23 a lut kha kum 2024 a endik niin, 2025 ah award ceremony hi neih a ni. Shilpgram, NEZCC, Guwahati ah programme huaihawt niin, April ni 8, 2025 tlai dar 5 ah award semna neih a ni. He award ceremony ah hian seven-day-workshop Bihu lam chu ropui taka lantir a ni bawk. 

Mizoram atanga award dawng pahnih hi Mizoram Art Development Society (MADS) member ve ve an ni a. MADS member te chuan an lawmpuiin hlawhtlinna lian zawk nei turin duhsakna an hlan a ni.