251/2025-2026

Aizawl, 22.04.2025: Vawiin chawhma khan School Education Minister Dr. Vanlalthlana chuan Govt. Model Middle School, Chawnpui School insawnna tur building sak mek chu a hmunah a enfiah. Minister hi Aizawl West-I bialtu MLA Pu TBC Lalvenchhunga, Adviser to Chief Minister ni bawk chuan a tawiawm a ni.

Kum 2021 August thla khan Govt. Model Middle School, Chawnpui leh Chawnpui Presbyterian kohhran chu Cabinet Meeting thutlukna angin ram an lo inthleng tawh a. School sawnna turah hian tunah UD&PE Department kaltlangin building sak hna thawh mek a ni. School Education Minister leh bialtu MLA ho hian vawiin ah chik taka hna thawh dan thlithlai a ni a. Khawtlang hruaitute’n lo dawngsawngin, ruahmanna an lo siam te an lo hrilh a ni. Govt. Model Middle School, Chawnpui hi enrollment rate a san belh telh telh thu an sawi bawk.

Minister Dr. Vanlalthlana chuan zirna in hma a sawn tur chuan zirlaiten zirna environment tha an neih a pawimawh thu sawiin, tuna building sak mek chu zirlaite dawl zo tak a nih tur bakah school in a ken tel tur mamawh hrang hrang te chu plan ah telh a pawimawh thu a sawi a . A tul dan angin building plan pawh ennawn a nih tur thu leh, building sak zawh a nih hnu ah UD&PA department chuan ram neitu Education Department kutah a hlan tur thu a sawi.

Education Minister hian Chawnpui Govt. Primary School leh High School te tlawh bawkin, thawktute nen inkawmhona a neihpui bawk a ni. School Education Department officer ten an tawiawm bawk a ni.