250/2025-2026

Saitual, the 22nd April, 2025: Vawiin chawhma dar 10:00 khan Keifang Centenary Sports Complex, Keifang-ah Mizoram School Education Department leh Mizoram State AIDS Control Society (MSACS) tangkawp buatsaih ni 3 awh tur MSACS Sports Festival 2025 chu Saitual Bawrhsap Dr. Lalngura Tlau chuan a hawng.

He hunah hian khuallian Dr. Lalngura Tlau chuan thu sawiin, MSACS leh School Education Department ina zirlai naupangte tana sports hmanga ruihhlo dona leh HIV/AIDS dona hun an buatsaih chu lawmawm a tih thu a sawi a. Bawrhsap chuan zirlai naupangte chu an hma hun an kuta awm a nih avangin duhthlanna dik a pawimawh hle a ni, a ti a, duhthlanna dik lo an siam chuan hrehawmna leh lungchhiatna an hmabak dawn a ni, a ti.

Dr. Lalngura Tlau chuan ruihhlo leh HIV AIDS laka him turin tun atanga duhthlanna dik siam turin zirlai kalkhawmte chu a fuih a, khawvel hlimna ringawt ngaihtuah lo a, taksa, rilru leh thlaraua hlimna famkim nei thei turin mahni inhmangaih tak chunga duh thlanna dik zawk siam turin a chah a ni.

Pu Joseph Lalnunmawia, Asst. Director, (CSS & GIPA), MSACS, Aizawl pawhin thu sawiin, zirlai kalkhawmte chu ram leh hnam innghahna leh Saitual District hma lam hun hriltu an ni, a ti a, hei vang hian nun uluk turin a chah a ni. Pu Joseph Lalnunmawia chuan HIV natna tihdam theih tawh lohin kan ram min run mek tih a sawi a, kan rama HIV hrik pai chu pung zelin, chung zinga tam ber chu kum 15-34 an ni a, a ti. HIV hrik te chu mipat hmeichhiatna leh ruihhloa inchiu atang kai an tam ber tih sawiin, heng a kai theihna kawnga fihlim turin leh nun uluk zel turin zirlate chu MSACS Asst. Director chuan a chah a ni.

He hunah hian kalkhawmte chu Pu Mickey Lalenkawla, DEO & DPC kaihruaina hnuaiah ruihhlo ti lo turin an intiam a. School tin atanga aiawh te chu kal khawmin Pu F. Lalthangzuala, Hdm, RMSA Sec. School, Saitual kaihruainain inelna thianghlim nei turin an intiam a, Govt. High School, Saitual Pipe Band te chuan rimawi an tum bawk a ni.

MSACS Sports Festival hawnna hun hi Pu Mickey Lalenkawla, DEO & DPC chuan a kai hruai a, report hi Pu R. Lalhmangaiha Secretary, Organising committee atanga ngaihthlak a ni. Dr. Lalngura Tlau, Saitual bawrhsap leh Pu Joseph Lalnunmawia, Asst. Director, MSACS te chuan thu an sawi a. MSACS Sports Festival-ah hian Saitual town area-a high school leh higher secondary school te chu infiamna chi hrang hrang hmangin an inel dawn a ni.