Vawiin hian Serchhip DC Conference Hall ah Government of India, Department of Personnel & Training ruahmanna hnuaia India ram puma neih mek Induction Training Programme for Cutting Edge Covernment Functionaries chu Administrative Training Institute, Aizawl bul tuma neih tan a ni a. Serchhip a sawrkar Department hrang hranga hnathawk UDC, Assistant leh LDC mi 27 ten ni 12 chhung an training zui ang. 

A hawnna inkhawm tawi buatsaihah Pu S B Shasank, IAS, Director, ATI chuan hawnna thu sawiin, sawrkar laipui chuan India rama sawrkar hnathawk Group hrang hranga miten, hlawk zawka mipui rawng an bawl theihna tura an mamawh hrang hrangte a zirchian hnuah, State tina Administrative Training Institute te kaltlangin training hi a kalpui a. Mizoramah pawh ATI in hei hi kalpuiin vawiin hi Serchhipa a tum hnihna a ni tawh a ni. Tin, ram chhunga he training kalpui tha ber State te zinga mi kan ni mek bawk a ti a. Serchhip-a training thawhhnihnaa tel tura thlan sawrkar hnathawkte chuan he training hi an hlawkpui ngei dawn a ni tih sawiin, inrintawkna te, mipui dawr dan tha zawkte, dan pawimawh a bikin RTI chungchangte, Department dangte nena indawr tawn dante, buaina sutkian dan (Stress management) thlengin mumal leh kalhmang nei takin an zir dawn a ni, a ti. Hei bakah hian mipuite chhawr kan nih ang ngeia vantlang tana mi tangkai ni tura nun dan thlengin an zir dawn a, Blood Donation Camp neih a nih bakah hmun thlan bika mipuite harsatna leh mamawh zirchian pui anni bawk ang, a ti. Pu S B Shasank hian, training tura kalkhawmte chu  ATI zirlai naupang an nih inhre tur leh thuawih leh training hun te vawng dik thlap turin a ngen a ni. 

He hunah hian Serchhip Bawrhsap Dr. Lalrozama, IAS pawhin thusawiin, Serchhip District a Group B leh C hnathawkte zingah hmeichhia an tam avangin a hrana mahni in chhuahsana ATI Aizawla training tura intirh a awlai lova, chutihlaia ATI zawkin training min pe tura min rawn pan hi a lawmawm em em a, kan vannei hle a ni. Chuvang chuan training tura thlan te pawhin thahnem ngai takin, Course Co-ordinator ten tih tur an tih ang zawng zawngte tia, hun vawng dik turte in a hrilh a, Head of Offices te pawhin an staff training mekte chu lo pawt buai rih lo mai turin a hrilh a ni.

A hawnna inkhawm hi Pu Lalsangpuia, Deputy Director, ATI & Course Coordinator ni bawkin a kaihruaia, a ni kaihhruaina hnuaiah hian tun hapta chhung chu training hi kalpui tura ruahman niin, karleh atangin Pu Hmangaihzuala, Deputy Director, ATI in a rawn chhunzawm ang. Tin, Pu Lalfakawma Chhakchhuak, MCS, DLAO Serchhip chu Local Course Coordinator a ni bawk ang. 

Vawiina Induction Training Programme hawnna inkhawmah hian training tura thlan te bakah Serchhipa Head of Offices zawng zawngte an tel a ni.