2698/2026-2027

Aizawl, 15th October, 2026: Vawiin khan Mizoram sorkar office hrang hrang atanga POSH Act, 2013 Master Trainer atana thlante tan Taxation Auditorium, MINECO ah ni hnih awh tur training buatsaih a ni. He training hi state flagship scheme, Banakaih Scheme leh Social Welfare, Women & Child Development Department leh SPNIWCD, Guwahati tangkawp a buatsaih a ni. Principal Secretary GAD Pu Sudhir Kumar chuan he programme hawnna inkhawm hi a hmanpui.

He training ah hian Sexual Harrasment of Women at Workplace (Prevention, Prohibition and Redressal) Act, 2013 , POSH Act tia hriat chungchang leh a kenkawh dante inzirtir a ni a. Hnathawhna hmun hrang hranga Internal Complaint Committee din tur a nih dan te, complaint a lo luh a bawhzui dan te, enge case tling leh tling lo te, a taka thil thleng leh lo chinfel a ni tawh dan te zirho a ni a. Vawiin, a ni khatna ah hian resource person atan Pi Thangzamawi Guite, Assistant Director, SPNIWCD leh Pi Flora Laltanpuii, SNO (POSH Act) & DD (W) te ruat an ni a. Naktukah training hi chhunzawm a ni ang.

He training hawnna inkhawm ah hian Principal Secretary Pu Sudhir Kumar chuan state dang nen khaikhin chuan Mizoramah mipa leh hmeichhia inkar a inthlaulo zawkin, hnathawhna hmunah pawh an intluktlang viau a ngaih a nih laiin POSH Act hnuaiah hian complaint lut a awm hrim hrim chuan hmalakna tur a awm tih a tilang a ni a ti a. Hnathawhna hmun chu tu tan pawh hmun him a nih theih nan hmalak ho a tul a ni tiin, POSH Act hian hnathawhna hmun him a siam mai piah lamah khawtlang nunah pawh nghawng tha a nei thei dawn a ni a ti. 

Training hawnna inkhawmah hian Pi Lalzarmawii, Commissioner & Secretary, SWW&CD chuan kalkhawmte lawmna thu sawiin, WCD Director Pi Zoramthangi Chhangte chuan programme chungchang tlangpui a sawi a. Joint Secretary Pi Zonunthari chuan lawmthu sawiin inauguration programme hi a khar a ni.