2354/2023-2024

Dated Serchhip, the 18th October, 2023: October ni 18 atanga October ni 20, 2023 thleng awh tur Young Voters’ Festival chu Government Serchhip College ah neih tan a ni a. Vawiin khan Election Officer Pu Lalrinsanga Hnamte chuan hawnna programme ah khuallian niin festival hi a hawng a ni.

Pu Lalrinsanga Hnamte chuan democracy rama inthlan pawimawhzia sawiin thalai voters te ti phur tura Young Voters’ Festival huaihawt a ni chu lawmawm a tih thu a sawi a. Election Commission of India chuan voters zawng zawng ten vote an thlak ngei theihna turin tan a la; tar chak lo te, rualbanlo te, hrisel lohna avanga polling station thleng thei lo tur te tan pawh ruahmanna a siam a ni, a ti a. Chutiangin, vote nei thar thalai te zingah pawh Systemic Voter Education and Electoral Participation (SVEEP) kaltlangin Electoral Literacy Club din a ni a, nasa takin tan lak mek a ni, a ti. Vawiina kalkhawmte chu festival hlim taka hmang turin a duhsak a. He festival in a tum ber, vote thlak hlutzia hriaa, midangte hnenah pawh hrilh darh a, a zirtirtu nih tum theuh turin Election Officer chuan zirlaite a chah a ni.

Young Voters’ Festival hawnna inkhawmah hian Serchhip District SVEEP Mascot Contest lawmman sem nghal a ni a. DIPRO leh SVEEP nodal officer ni bawk Pi Lalnunmawii’n he hun hi a kaihruai a. Lawmman te hi Election Officer Pu Lalrinsanga Hnamte chuan a sem a ni. Lawmman pakhatna dawngtu chu Laltluangliani, New Serchhip a ni a; lawmman pahnihna dawngtu C Lalchhanchhuahi, P&E Veng, Serchhip niin lawmman pathumna dawngtu chu Vanlalengfiaha, 3rd Semester BA, Government Serchhip College te an ni.

He ni thum awh festival ah hian extempore speech, quiz, declamation contest, reels making contest, selfie contest, hashtag campaign, signature campaign, flyer making contest, on the spot essay writing contest, on the spot slogan writing contest, on the spot painting competetion te neih a ni dawn a.

Serchhip District ah hian inthlanpui 2018-a neihah vote za zelah 85 dawn a tla a. Kuminah hian 90% a tlak theih nan tan lak a ni a. SVEEP leh ELC tangkawp chuan Project 90 chak takin an kalpui mek a ni.

Hawnna programme tawi buatsaihah hian Govt. Serchhip College Principal Pu C.Laldintluanga chu Chairman a ni a, Student Union Vice President Benjamin C.Lalrinawma’n lawmthu sawiin hun hnung a khar a ni.