NLUP Implementing Board meeting vawi 12-na chu vawiin khan NIB conference hall-ah neih a ni a. Pu J.H.Rothuama Chairman NIB in meeting hi a kaihruai a ni.

Vawiina NIB meeting ah hian NLUP hmalakna te chhui zui tura chak zawka monitoring kalpui na tur te, Apex Board lo rel tawh anga kum 5 chhung NLUP kalpui chhunzawmna tur supplementary plan a thil belhchhah ngai te, thlai leh ran sem tur input supply a harsatna chinfelna tur te sawiho a ni a. Heng ah te hian ruahmanna siam dan tur rel ho a ni a. Hei bakah hian Chalfilh leh Tuivawl Cluster a Captive Farming kalpui tum mek, a hmuna enfiah dan tur pawh relin NIB meeting vawi 12 na chuan NLUP line department hrang hrangte sum mamawh rualkhai zawka sem sawm chungchang te, bial hrang hranga beneficiary trade thlak dil te kalpui dan tur chungchang te, Hrangturzo biala One Village One Crop kalpui tum meka serthlum huan siam ve theilo te harsatna chungchang te pawh an ngaihtuah ho a ni.

NIB Chairman Pu J.H.Rothuama chuan NLUP atana thawktu zawng zawng ten ram tana inpekn thuk lehzual neih a ngai tiin he project hlawhtling taka kalpui a nih theih nan Board members te leh line department zawng zawng te chu thurawn inpe a, infin chhuah tawn turin a ngen a. NLUP kalpui tawh chinah duhthusam tawk lo tam tak awm mah se, a pumpui thlirin hlawhtlinna eng emaw zat a awm chu thil lawmawm tak a ni, tiin hlawhtlinna sang zawk nei turin uluk lehzuala monitoring kalpui a tul, a ti bawk.

Vawiina meeting ah hian line department zawng zawng ten NLUP phase I atanga hma an lak tawh leh an thlen chin te report in an department theuhva hlawhtlinna hmuh tawh dan te, harsatna tawh te leh an sum hman dan te an tarlang a. Board members ten zawhna an neih te zawtin line department te nen sawihona an nei a ni.