Nimin Ni 27/3/2018 atang khan Mizo Zirlai Pawl Hqrs, Mamit bultumin Chhimveng YMA Hall, Mamitah nihnih awh Mamit District Cultural Meet neih a ni a. Pi Lalbiaksangi, District Bawrhsap chuan khuallian niin he hun hi a hmanpui.
Khuallian Pi Lalbiaksangi chuan Mamit District Cultural Meet hmang tura kalkhawmte chibai bukin Mamit District chu hnam hrang hrang awmkhawmna, tawng leh vun rawng pawh inang lo tak tak kan ni chunga kan inpumkhat tlat reng nachhan chu thalai, kan District inpumkhatna duhtute thawhrah vang a ni a ti. Hnam hrang hrangte inpumkhat lehzuala thawkho tur leh kan culture theuhte chawinunna kawnga hmalatu ni turin kalkhawmte a chah bawk. Zirlaite fuihna thu sawiin Sorkar hna thawh kher tum lova Skill Development lama thangharh tur leh Mizoramah hna kan hmu mai lo a nih pawhin Mizoram pawna fehchhuah hreh lo turin a chah. Cultural Meet chu kan District chhunga hnam hrang hrangte inpumkhat zelna atan kum dangah pawh huaihawt zel turin MZP Hqrs, Mamit a chah bawk.
He hunah hian Pu L.Ramdinliana Renthlei, President, MZP General Hqrs pawhin thu sawiin India khua leh tui kan nih angin inpumkhat leh inlungrual taka kan chenho a tul a. Kan innghirngho reng a, kan hnam tihdan leh nunphungte kan inngaihsan tawn loh chuan kan ram leh hnamin hma a sawn thei dawn lo a ni tiin a hnam tam zawk Mizote'n a hnam tlem zawkte kan dawm thiam a, pachan chang taka kan chenhopui a tul a. Kan District chhunga hnam pakhat harsatna chu hnam dang harsatna pawh a nih ve tho avangin lungrual takin ke kan pen ho tur a ni a ti.
Pu Lalropuia, President, MZP Hqrs Mamit pawhin thu sawiin Mamit District bikah chuan hnam hrang hrang leh Sakhaw hrang hrang vuantu tam tak kan awm a. Heng hnam bil leh Sakhaw hrang hrang vuantute hian hunpui leh Kutpui kan nei vek a. Chung Kutpui leh hunpuite chu inngaihhlutsak thiam ila tun ai hian kan inpumkhatna pawh a tha zawk dawn a ni tiin kan culture hi a inher danglam reng a, chumi mila kan khawsak thiam ve zel a pawimawh a ni a ti. Tanrualna pawimawhzia sawiin kan theihna zawn theuhah, kan tih theih awm ang ang kan tih hian kan hnam tan theuh mi tangkai kan ni a, ka ram tan eng nge ka tih ve ang tih inzawt fo turin kalkhawmte a chah bawk.
Vawiin Programme hi Nl.C.Lalrinhlui, Executive Committee Member, MZP Hqrs Mamitin a Host a, Christopher Lalmuankima, Organising Secretary-in Report a pe a ni. Aizawl lam atangin MZP General Hqrs hruaitute'n an telpui bakah Saitual MZP te'n he hun hi an rawn hmanpui bawk a. Mamit khawpui chhung bakah District chhunga khaw hrang hrang Reiek, W.Phaileng, Zawlnuam, Kawrthah leh Damparengpui atangte a kalkhawmin hnam lam chi hrang hrang mawi tak tak thlirho a ni.
Attachment
- Loading attachment...
