3755/2023-2024

Dated Serchhip, the 9th February, 2024: Kum kalta 2023 chhung khan Serchhip District-ah phal lohna hmuna mei zu mi 72 zet man an ni. Hei hi vawiina CMO Conference Hall, Serchhipa kohhran hrang hrang hruaitute tana workshop buatsaihah sawilan a ni a. He workshop hi Dr LP Malsawma, Sr.CMO chuan a kaihruai a ni.

January, 2023 atanga December, 2023 thleng khan Serchhip District Anti-Tobacco Squad te chuan Squad Drive tum 35 an nei a. Dan-in meizuk a khapnaa meizu an awm leh awm loh leh meizuk khapna Dan siam hrang hrang bawhchhia an awm leh awm loh an enfiah a, hengah hian Dan zawmloa puipunna hmuna meizu mi 72 man niin heng mi te pawisa chawi tlingkhawm chu Rs. 3,490/- a ni.

Nikum chhung khan Serchhip-a Tobacco Cessation Clinic (TCC) chu mipa 134 leh hmeichhia 88, an vaiin mi 222 ten an pan a, an zinga mi 36, mipa 17 leh hmeichhia 19 te chuan vaihlo leh a kaihhnawih an tih thin ten an sim a, hei hi TCC pantu atanga chhutin za zela 19.45 an tling a ni.

Nikum chhung khan hmun hrang hrangah Vaihlo leh a kaihhnawih hmang lo tur leh a that loh zia inzirtirna te pawh buatsaih thin a ni bawk.

Vawiin training program ah hian Dr H Lianthangpuia State Nodal Officer, NTCP&Addl.Director(D) Directorate of Hospital Medical Education(DHME) ni bawk chuan zuk leh hmuam do chu kohhran hruaitute atanga bul tan ni se tha an tih thu a sawi a. Vaihhlo leh a kaihhnawih la tilo te venhim leh ti mek te sim tir chu an tum ber a nih thu leh Kohhran hruaitute pawhin hei hi tlangau pui tam se an duh thu Nodal Officer chuan a sawi a ni.

NTCP State Consultant Pu R. Lalremruata chuan vaihlo leh a kaihhnawihin mihring taksa a tihchhiat theih dan presentation a pe a. Zawhna leh chhanna hun hman a ni bawk.