Mizoram-in engineering degree course zirna a neih hmasak ber National Institute of Technology (NIT) chu 21.7.2011 atang khan zirlai 21 neiin Bethel, Chaltlang, Aizawl-ah class tan a ni ta a. 25.7.2011 chawhnu dar 1.30 khan Pu Lalsawta, Higher & Technical Education Minister leh Pu Chawngtinthanga, Parliamentary Secretary te chuan official pawimawhte hruaiin Chaltlang-a NIT Administrative Block leh Tanhril-a mipa leh hmeichhe hostel tura ruahman Saizahawla Boarding School thin chu an tlawh a ni.

Minister Pu Lalsawta hian zirtirtute leh zirlaite hnenah thuchah sawiin, “India ram hla tak tak atangin NIT Mizoram-ah zirna tha umin in lo kal a, in lokal chhan ang ngeia zirna tha pek che u hi kan tum a ni. Nimahsela, NIT Mizoram hi a bul tan kum chauh a la nih avangin NIT changtlung tawh sa te nen a hmunhma chungchangah leh thil dangahte sitna rilru pua khaikhin lovin, India rama NIT tha ber ber-te nena khaikhin tlakah zirlaite hian vawrh san kan tum zawk tur a ni” tiin a fuih a ni.

Pu Chawngtinthanga pawhin zirtirtute leh zirlaite lawmna thuchah sawiin, “Mizoram-ah hian state dangte anga industry lian pui pui din a remchang ve lo a; amaherawhchu, kan sik leh sa nuam tak leh ralmuanna boruak nuam tak te, kan hnam nunze mawi takte hi India rama zirna in tha ber ber dinna atana duhthusam a ni a. Chuvangin, NIT Mizoram hmasawnna leh hmingthatna atana Mizoram sawrkar leh mipuiten thahnem kan ngaih aia nasa zawk maha zirtirtute leh zirlaiten tan in lak a tul dawn a ni” a ti.

Pu Lalsawta chuan zirtirtute leh zirlaite chu an harsatna tawhte zep nei lova sawi chhuak turin a sawm a; zirtirtute leh zirlaite chuan zirna lamah leh ei leh in, chenna chungchangah te harsatna engmah an neih loh thu sawiin, “NIT Mizoram bul tantute zinga kan tel hi kan inchhuang ve em em a; kan rin leh beisei aiin Mizoram sawrkar leh a buaipuituten thil changtlung tak min chhawpsak a, kan lawm em em a ni. Tuna kan classroom-te leh laboratory-te hi Ist Semester leh 2nd Semester zirna atan chuan a tawk em em a. Tin, a practical-a laboratory-a  inzirtir theih a nih dawn bakah, hostel lamah pawh computer software hmangin zirlaiten a tak ang chiaha zirna remchang an nei thei dawn a ni. Director neih thuai erawh kan hmasawn chak lehzualna atan a pawimawh a ni” an ti.    

NIT Mizoram hian administrative leh academic block atan Chaltlang-ah mimal in pahnih an luah hawh a; hetah hian a vaiin classroom leh laboratory 29 a awm a, staff room 4, office room 2, hall 1, library hall 1 leh store-room te a awm a ni. NIT Mizoram-ah hian Department 7 awm tura ruahman a ni a; tunah branch 3 – Computer Science Engineering, Electrical & Electronics Engineering leh Electronics & Communication Engineering te a awm a ni. Laboratory hi a kum khatna atana hman tur chuan hmanrua a kim tawh a; August 2 hian khawl tam zawk a rawn thlen belh ang. Hmanraw hrang hrangte pawh 3rd semester atanga hman tan theih turin remkhawm mek a ni bawk. NIT hian library changtlung tak a nei nghal a; zirlaite tana tangkai tur lehkhabu cheng nuai 40 man zet chhawpsak an ni nghe nghe.NIT hostel, Tanhril-ah hian zirlai 200 leng tura ruahman a ni a; tunah hian mipa hostel-ah hian zirlai pariat an awm a; hmeichhe hostel erawh a la ruak rih a ni.

NIT Mizoram-ah hian Associate Professor 7 an awm mek a; anmahni zirna lama Ph.D degree nei 2 te bakah mi dang zawngte chu M. Tech vek an ni a; non-teaching staff 8 awmin, an zinga 4 chu Master degree nei an ni a, mi dang 3 te chu B Tech an ni a, HSSLC pakhat a awm bawk.Tuna zirlaite hi Mizoram bakah Assam, Uttar Pradesh, Rajasthan, Jharkhand leh Bihar atanga lokalte an ni. Central Counselling Board, AIEEE chuan 25.7.2011 khan seat allotment round 4-na a tichhuak leh tawh a, state pawn lam atangin engineer zir duh zirlai thahnem zawkin NIT Mizoram-ah admission an la rawn tih chhunzawm zel a rinawm a; seat allotment hi round 5 thleng a awm ang. NIT Mizoram Director tur chu Ministry of Human Resource & Development chuan a ruatfel thuai dawn tih Pi Esther Lalruatkimi, Higher & Technical Education Secretary chuan a sawi.