Vawiin chawhma dar 11 khan DIC Conference Hall, Ramhlun Venglai-ah NLUP hnuaia carpentary I & II thlangtute tanpuina khawl leh sum fai sem a ni a, hetah hian Pu Robert Lalchhuana, Prominent Journalist leh NLUP Apex Board member chu khuallian a ni.

Pu Robert-a chuan NLUP tanpuina dawng tur kalkhawmte hmenah, “Sorkar-in in bul tanna tur cheng nuai 1 chuang senga a puihna che u hi hmang tangkai ula, in tu leh fate thleng a eizawnna ngialnghet siam nan hmang ngei turin in buatsaih rawh u” tiin a chah.

He hun pawimawh taka thusawitu dang, Pu R. Selthuama, MLA, Chairman, NLUP Implementing Board chuan NLUP chu rinawm tak leh taimakna nen dinchhuah pui ngei tura tanla turin kalkhawmte a chah a, “Sorkar-in a tih tum a tiam che u chu a ti hlen ta a, a hlawhtlinna chu nangmahni kutah a innghat tawh a ni, mahni inbum lovin mahni tan ngei a ni tih hre chiang chungin tanla rawh u” tiin a hrilh a ni.

Vawiin hun hman na hi Pu David L. Thangliana, Chief Media Officer, NLUP Implementing Board/I & PR chuan a kaihruai a, Pu John Saikhuma, General Manager, DIC chuan technical report a pe a, Pu Hmunsiama, Nodal Officer, NLUP, Industry department chuan lawmthu a sawi a ni.

NLUP tanpuina hi Aizawl West III, South II, North II, North III, West II, East II leh Tuivawl Cluster chhungkaw 156 hnenah a vaiin Rs. 93,73,760/- sem a ni.