Vawiin chawhma ah khan Agriculture Department’s Conference Hall ah NLUP Line Department pakhat, Fisheries Department chuan an Department hnuaia NLUP tanpuina dawng tute ko khawm in zirtirna an pe a. He hunah hian 3rd Phase a beneficiaries 101 leh 4th Phase a beneficiaries 55 te hnenah Sangha dil khuah nan NLUP hnuaia tanpuina sumfai Rs. 40,000/- theuh Dr.B.D. Chakma, Minister of Fisheries chuan a hlan nghal a ni.

NLUP tanpuina dawngtute zawng zawng chu inelna thianghlim, hlawhtling ber nih tumna rilru pu se tun aia hma an sawn chak thei zawka a rin thu Fisheries Minister Dr.B.D. Chakma chuan a sawi a. NLUP chu Mizoram chhunga ram leilung zau zel tawh chuang lo tur, tha zawk, hlawk zawka enkawl bakah a ram chhung mipui te tana buh leh bala intodelhna thawh chhuah a tum a ni a ti a. Sawrkar in a duhsakna te chu a lothlawn mai mai a chhuah lo hram tur leh hlawhtlinna nena chhang let turin Beneficiaries te chu fuih a. Tanpuina sum an dawn te pawh Krismas vuak vet ah awmze nei lova tlak ral lo tur leh sangha dil tha tak khuah nan hmang theuh turin a ngen a . Hna thawh hun( working season ) a in tan tawh avanga sangha dil laih hna pawh thawh tan hun lai tak a nih thu a tarlang tel bawk a ni.

Thusawitu dang Dr. B.D. Tyagi, Director of Fisheries leh Pu S.P. Singh, NLUP Nodal Officer te pawn Sangha khawi hlawkna te sawiin NLUP hnuaia sangha khawi a hlawhtlin a beisei awm thu an tarlang a. Hun reilote chhungin Andhra Pradesh leh hmun dang atanga sangha Mizoram in a lakluh ziah thin aia tam mah NLUP beneficiaries te chuan an thar theih thu Fisheries hotute chuan an sawi a ni.

Fisheries Department in NLUP beneficiaries te puala hun a buatsaih hi Pu Lalrochhara, DFDO, Aizawl in a kaihruai a. NLUP hnuaia sangha khawi tura thlan te hian Sangha Dil khuah dan, Sangha leh ran dang khawi pawlh dan bak ah Mizo in Japan sangha an tih mai, ‘Common Carp’ khawi dan te Fisheries Officers te hnen atangin an dawng sawng.