Vawiin khan Mizoram pumah NLUP 2nd Phase (thawh hnihna) Sem Runpui neih a ni a, Aizawl tiamin District, SDO(Civil) leh BDO Headquarters ah te, a vaiin khaw 24-ah he programme hi a ruala buatsaih niin beneficiaries thlanchhuah te hnenah NLUP tanpuina hi a cheque a pek niin hei vang hian Mizoram chu Ram pumah Direct Cash Benefit Transfer hmang hmasa berte zing ami a ni ta a ni.

Aizawla NLUP Semna programme Vanapa Hall-a, Aizawl khawpui chhunga Cluster hrang hranga beneficiaries te tana buatsaih chu Chief Minister Pu Lal Thanhawla’n khuallian niin a hmanpui a, a nupui Pi Lal Riliani chuan a tawiawm bawk. He programme-ah hian Finance Minister leh NLUP Nodal Minister nibawk Pu H. Liansailova chu khualzahawm niin; Home Minister Pu R. Lalzirliana leh Transport Minister Pu P.C. Zoram Sangliana te pawh he programme-ah hian an tel a. Assam Legislative Assembly-a MLA Pu Bora pawhin a rawn hmanpui bawk.

Pu Lal Thanhawla chuan hun hmasa lama NLUP kalpui tawh chu a dawngtu tur leh Line Department te zirchian anih loh avangin a kalpui dan chu a tha tawk loa mahse tun tum NLUP hi chu Baseline Survey te neia a hlawhtlin ngeina turin mithiam te rawnkhawma, Line Department te a theih anga tha a buatsaih a, NLUP chungchang pawh a zau thei ang ber mipui te hnenah inhrilhriatna leh inzirtirna te neih anih avangin a dawngtu, a tam thei ang ber ten an hlawhtlinpui ngei thei nan, a tha thei ang berin Sawrkar chuan NLUP chu a buatsaih leh a ruahman a ni, a ti.

NLUP chu Chunglam pek anih thusawiin Pu Lal Thanhawla chuan NLUP hian Sawrkar hnathawk emaw, mi hausa emaw a zawng lova, kut hnathawktu te, loneitu te, huan siam te, hmeithei, pachhia leh miretheite a zawng a, an chanvo hi a bo tur a ni lo a, a khawihtu ten an itpui tur a ni hek lo a ni, a ti. NLUP hi michanhai leh miharsa ten lei rem an rah ve theina atan leh khaw eng an hmuh theihna piah bakah reitheina khur atanga heng mite khaichhuahna programme anih vangte in NLUP hi Kohhran leh tlawmngai pawl ten an phurpui avangin an chhunga lawmthu a sawi. NLUP dawngtu te chu rinawmna, dikna, taimakna leh Pathian tihna nena an hnathawh chu kalpuia Mizo chu hnam zahawm leh Mizoram chu ram intodelh a siamna kawngah theitawp chhuah turin a chah a ni.

Pu H. Liansailova chuan Sawkar Laipui-in Direct Cash Benefit Transfer a sawi chu Mizoram chuan NLUP-ah hian a takin a hmang mek a, Ram puma he scheme hmang hmasa berte zing ami kan ni awm e, a ti. NLUP chuan hrinchhuah a ngah thusawiin RKVY-a kum tin vaibelchhe za chuang kan dawn te, NLUP dinchhuahpui, sawi tur tam tak an awm tawh te, thingtlanga nuai hnih khat thawkchhuak sawi tur awm te leh GSDP kumhnih khata a pung chho te hi a ni a ti. NLUP hlawhtlinna hi mipui ten an phurpui zia Vanapa Hall-a leng lo khawp kalkhawm hian a ti chiang hle a ni a ti bawk.

Vawiin khan beneficiaries mi 40 (Line Department 8 ten mi 5 theuh an thlanchhuah) te hnenah NLUP tanpuina cheque hi Chief Minister in a hlan a ni.

Programme hi NIB Vice Chairman Pu P. L. Thanga, IAS (Retd.) chuan kaihruaiin Rev Lalzuithanga, Executive Secretary, Mizoram Synod chuan hunserh a hmang a. He hunah hian Chief Secretary Pi L. Tochhong pawh telin thu a sawi a, Rev. Dr. K. Thanzauva, Member, Consultative Committee on NLUP pawhin thu a sawi bawk.

NLUP Phase II tanpuina vawiina sem ah hian mipui an tam avangin, vawikhata Vanapa Hall-ah leh Line Department Office-ah te vawiina sem vek hman a ni lo a. Beneficiaries te awlsam zawk nan NLUP Implementing Board leh Line Department te chuan veng hrang hranga sem dan tur ruahmanna an siam nghal a. Local Cable TV a hriattirna an tihchhuah lo ngaichang turin beneficiaries te an hriattir an ni.

NLUP Phase I khan beneficiaries mi 45,139 a tuam a, hetiang bawk hian NLUP Phase II pawh hian mi 45,000 tuam tura ruahman a ni a. NLUP Phase III ah hian beneficiaries mi 29,861 tuam tura ruahman niin hengte hi an sum hmuh tur Ist Installment chu kumin September tir lamah pek hman tum a ni. Heng bakah beneficiaries mi 15,000 Planning Commission in a rawn phalsak te chu NLUP Phase IV a cover tura ruahman a ni ang.