Pu Lal Thanzara, Parliamentary Secretary chuan Vawiin chawhma dar 11:00 khan Serchhip DC Conference Hall-ah NLUP 2nd Phase 2nd instalment trade hrang hranga NLUP dawngtute hnenah a sem a, mipui Conference Hall leh tualzawl a leng lo an kalkhawm bakah Serchhip khawpui huamchhunga Sawrkar pisa hotute an kal tha hle a ni.

NLUP sem runpui puala inkhawm buatsaih hi Pu Lalsangliana, MCS Addl. D.C Serchhip-in a kaihruai a, khuallian Pu lal Thanzara chuan thusawiin, Kristian, ringtu tha awmkhawmna ram kan nih avangin Sawrkar lo awm tawh zawng zawngin mirethei khaichhuahna policy hrang hrang an kalpui tawh zingah eng hian nge Pathian malsawmna dawnga hlawhtlinna hmu tha ber tih hi kan ngaihtuah uluk a tul a, a chhanna chu NLUP hi ani tih pawh a chiang nghal hle a ni a ti a, NLUP chu miretheite puih duh policy, miretheite thleng phak a nih avangin Pathian pawhin ahriatpui ani a ti a; Synod Social Front in an zirchianna ah pawh NLUP chu dinchhuahpui tham a tha ani tih an hriatpui thu a sawi bawk. Ram chhung leh pawn atang mithiam ten NLUP chu an tuipui thu sawiin hetiang Policy tha mirethei ten lei rem an rah ve theihna tur kan neih avang hian Pathian hnenah lawmthu sawi nachang I hria ang u tiin mipuite a chah a ni. NLUP chu kumin Inthlanpui neih anih hma ngei a beneficiary thlan chhuah chhungkaw tin hnena sem anih theih nan Sawrkarin theihtawp a chhuah thu a sawi a, harsatna hrang hrang vanga an Trade thlan ti hlawhtling theilo te tuamhlawm lehna turin Exit Protocol pawh ruahman a ni a, eizawnna bul Sawrkarin a tan sak tawh avangin; enkawl zuia, buaipui tur leh chhawmnun pui turin Sawrkar a in pe reng a ni tih a sawi bawk.

Khual Zahawm Pu C.Lalruata, MIFCO Chairman ni bawk pawhin NLUP chanchin a bulthum atangin a sawi a, NLUP dawng tawh te leh la dawng tur te chu mahni inbum lui lo turin a ngen a, nupui/pasal, khawtlang leh kohhran lakah kan rinawm lai hian; mahni leh mahni lakah kan rinawm tawk lo fo thin a, he scheme tha tak hi mahni inbum chung chuan a tihhlawhtlin theih loh ani tih hrechiang turin beneficiaries te a chah bawk a ni.

Vawiin inkhawmah hian Line Department hrang hrang atanga thlan chhuah beneficiaries panga theuh hnenah Khuallian leh Khual Zahawm te hian tanpuina sum hi cheque in an sem a, 2nd Installment dawng tur beneficiaries dang te chu an bank account theuhah pawisa vawiin vek hian deposit sak an ni a; vawiin a tihfel sak hman loh te pawh naktuk atang pekchhuah vek an ni dawn ang. Trade hrang hrang a 2nd Installment atana an pawisa dawn hi an Trade thlan azirin a in ang lo a ni.

Vawiin NLUP sem runpui inkhawm zawh hian DC Office chung tual zawl a NLUP Line Department hrang hrang ten Beneficiary hlawhtlingte thlalak an pho chhuah (Photo Exhibition) chu Khuallian leh Khual Zahawm ten an en a, mipui vantlang a duh apiang tan entheih turin chhawp chhuah a ni bawk. Hei bakah hian NLUP Line Department hrang hrang atanga NLUP beneficiary titha pakhat theuh thlanchhuahte Biangbiakna (Interview) nimin (August ni 6, 2013) khan neih niin nizan vek khan mipuite thlir theih turin Serchhip khawchhunga Cable TV hrang hrangah tihchhuah nghal a ni bawk.

Vawiin NLUP sem runpui inkhawmah hian District Bawrhsap pawhin inlawmna thuchah a sawi a, NLUP Beneficiary te aiawhin AH&Vety hnuaia Bawng vulh thlangtu Pu G. Lalhmunliana, Serchhip-V huamchhunga P&E Veng ami in thu a sawi a, a bawng vulh atang nitin bawnghnute litre 10 chuang a sawr ziah thu te, beneficiary thenkhat phei chuan nitin litre 20 chuang an sawrchhuah tawh thu te a sawi a, bawng note hralhna atanga sum lalut an awm tawh thute leh an bawnghnute sawrchhuah pawh a tam tham tawh avangin MULCO lamah chhun luh then dan te pawh an ngaihtuah mek thu a sawi bawk. Village Level Implementing Committee te aiawhin Pu Lalramliana Sailo, VCP, Serchhip-III pawhin thu a sawi a, NLUP in an khawtlanga hmasawnna hmuh theiha a thlen tir avangin Chief Minister leh a thawhpuite, Line Department officials te leh Beneficiary mi taima tak tak te chungah lawmthu a sawi bawk. Inkhawm hi Pu Robert C. Lalhmangaiha, MCS, NLUP Nodal Officer, Serchhip District-in lawmthu sawina hun hmangin a khar a, kalkhawm zawng zawngte tan thingpui ruai buatsaih a ni bawk.

Vawiin vek hian Serchhip District chhung hmun dang North Vanlaiphai leh Thenzawlah te NLUP 2nd Phase 2nd Installment sem runpui hi neih a ni a, North Vanlaiphaiah Pu Lalsawta, Minister, School Education etc., in a hmanpui a, Thenzawlah Lt. Col. Z.S. Zuala, Parliamentary Secretary leh Pu R. Selthuama, MLA, Chairman, NLUP Implementing Board ten an hmanpui bawk a ni.