Vawiin nileng khan Bualpui N Community Hall ah Mizoram Iskut Growers Association (MIGA) huaihawtin NLUP Iskut Awareness Campaign vawi 5-na neih a ni a, NLUP Implementing Board Chairman Pu R.Selthuama’n a hmanpui.
Campaign hi Pu Zosangliana Tochhawng, President, MIGA Hqrs, Sihphir-in a kaihruai a, NLUP hnuaia Iskut chin thlang tu ten an hlawhtlinpui ngei theih nana tanpui leh kaihhruai chu an tumpui berah neiin chutiang Campaign chu tum 6 - Hmar Chaltlang, Lungmuat, Nisapui, Lungdai, leh Sihphir leh Sihphir Vengthar ah neih a ni tawh thu te a sawifiah a. MIGA hnuaiah tunah chuan member 1250 an awm tawh thu a tarlang bawk.
NLUP Implementing Board Chairman Pu R.Selthuama chuan NLUP chu kuthnathawktu te chhanchhuahna programme a nih avangin a dawngtu te tan tih mai mai chi a ni lova, hlawhtlinpui tur chuan theihtawp chhuaha bawhzui ngai a ni a ti. Thenkhatin NLUP sem chhunzawm turin Sorkarin pawisa a nei tawh lo ti-a thu an thehdarh chu thu diklo tiin kum 2011-2012 chhunga sem atan Rs 219 crores ruahman a ni a, rokhawlhna avanga Industry department hnuaia trade thlangtu thenkhat ten first instalment an la lak theih loh chu an lak ve thuai theih nan Industry department hnuaia trade thlangtu te tan bik Rs 90.19 crores dah hran a nih thu a sawi lang bawk. Hemi lo awm chhan tak chu Industry hnuaiah hian a tirah beneficiaries 3,200 ruahman a nih laiin a tak takah beneficiaries 10,819 zet an tlin chhoh tak avang a ni ber a, hetianga sum ruahman fel a nih hnu chuan first instalment pawh an lak theih thuai tur thu a sawifiah bawk. Tih tak takna nena ti peih lo tan chuan a hlawhtlin theih dawn loh tiin NLUP tihlawhtling tur chuan a bul tan atanga kan chian a ngai a ni, Pu Selthuama chuan a ti bawk.
Mizoram-a Iskut chingtu ten an hlawhtlinpui ngei theih nan MIGA hian a chin dan leh enkawl dan kalhmangte hrilhfiaha beihpui thlak hna thawkin hma an la chho mek a. NLUP hmanga Sorkarin bultanna loneitute hnena a pek bakah hian mahnia thahnemngai taka thawhzui a ngaih thu te uar takin an hrilhfiah thin a. Iskut chingtute tana harsatna tawh theih te leh tuarchhel a tul thu te an inhrilhfiah bawk. Kumin ah hian Iskut 40,000 Quintals chuang Mizoram pawnah thawn chhuah a nih thawh thu te, Iskut hralhna atang ringawt hian Rs 2 crores chuang leichhuah a nih tawh thu te report ngaihthlak a ni bawk.
Vawiina Bualpui-a NLUP Iskut Awareness Campaign ah hian Pu T.Sangkunga, Secretary, Horticulture leh Kolasib DHO Pi Zosiamliani, Pu Laldingliana President, MIGA Bualpui Branch te pawhin thusawina hun an hmang a, hriatchian loh lai te inzawtfiahin sawihona leh inkawmhona hun tha tak an hmang bawk a ni. Bualpui ah hian Iskut chingtu chhungkaw 62 an awm a, chhungkaw 21 te chuan NLUP tanpuina an dawng a ni.
