Vawiin khan Serchhip District Horticulture Officer Pu Lalhmangaiha hovin Serchhip District chhunga Horticulture trade thlangtu te hnenah NLUP second installment Serchhip Cluster-a chhungkaw 157 te hnenah sem leh a ni a. Serthlum chingtu mi 59 te hnenah Rs.20,000, Lakhuih leh Tung chingtute hnenah Rs. 30,000 leh Aloevera chingtute hnenah Rs 25,000 te-a sem a ni. Ni 19 October hian Tuikum Cluster leh ni 27 October-ah Hrangturzo Cluster-te tan sem leh tura ruahman a ni bawk.

He hunah hian Pu Lalhmangaiha DHO Serchhip chuan NLUP dawngtute chu an trade thlan theuhah uluk taka hma leh tur te, mahni tana thawk an ni tih inhre reng tur leh thahnem ngai thar leh turin a chah a. He NLUP programme hi hmasawn nan leh dinchhuah pui tham ngeia hmang turin, vil leh endik pawh ngai lova thahnemngai taka thawk tur an nih thu sawiin a fuih thar leh a ni.

DHO Serchhip chuan tum tumah pawh hian First installment dawngtu 168 zinga 157 chiahin an dawng chhunzawm thei rih a, a dang chhungkaw 11 te hi chu hma la tha lo leh chhan dang vanga enthlak rih an ngaih avangin an pe chhunzawm tawh rih lo a ni tiin, uluk taka department-in an tlawh chhuah leh vek dawn bakah Village Monitoring ten an endik leh vek dawn avangin hlawhtlinpui tum tan chuan inthlahdah chi a ni lova, dawng chhunzawm zel duh tur tan chuan dawngdah san a thiang lo a ni a ti.

Tun tumah hian Serthlum thlangtu mi 59, Lakhuih thlangtu chhungkaw 93, Aloevera thlangtu chhungkaw 1 leh Tung thlangtu chhungkaw 4 te hnenah tanpuina hi sem a ni.