Mizoram a Sports Museum hmasa ber Directorate of Sports & Youth Services hmalakna a Mission Veng Bazar a mimal in luah hawha din chu vawiin chawhma khan Sports Minister Pu Zodintluanga chuan a hawng ta.

Museum hawnna inkhawm, Dr. Thantluanga In kawt Mission Veng a neih ah, thusawiin Pu Zodintluanga chuan Sports Museum hawn a ni chu Mizoram tan bung thar a ni, hranghlui infiammite sulhnu dah thatna bik kan nei ta chu lawmawm a ti. Minister chuan a phur na zawngin Museum-ah thil an dah theih dawn lo anih thu sawiin, thil dah turte chu uluk taka Expert Committee in an enfiah tur thu a sawi lang.

Minister chuan National Level infiamna chi hrang hranga Mizoram aiawh te an chet that thu leh lawmman an lak that thu a sawi a. Hei hi duhtawk mai lova khawvel huapa infiammi kan thehchhuah theih nan Sports Department leh Sports Council te bakah Sports Association hrang hrang te tha thar thawh a, hma la turin Pu Zodintluanga chuan a fuih.

Sports Museum din a nih theih nan SAY Department hian kum 2008 vel atang khan hma an la tan a. Museum atan hian Dr. Vanlalchama In (chawng thum) Mission Veng Bazar a mi chu August 2010 atang khan luah a ni a. Museum ah Trophy hlui thenkhat dah te chu –; Chawnga Hockey Cup 1930; Tilbury Cooke Cup 1931; Jai Bahadur Sahi Badminton Cup 1937; Zakunga Memorial Football Tournament 1968; Hmartawnphunga Badminton Tournament 1970; Pachhunga Memorial Football Tournament 1971; Lalhlira Memorial Badminton Tournament 1973 leh Thangkhama Memorial Football Tournament 1996 te an ni.

Museum a thlalak dah zawng zawng chu 582 a ni a. Thlalak hlui ber dah chu kum 1917 a Pu Chawngthanga leh Pu Zawngauva ten Paris Football Field sir a Rugby Ball an keng lai thla a ni. Hei bakah hranghlui Mizo infiammi thlalak te; Assam hunlaia Mizoram aiawh a fehchhuah thlalak te; India aiawh a Mizo infiammi leh delegation thlalakte; Mizo Olympian pathum (C Lalremsanga, Vanlaldawla leh Zomuana Ralte) thlalak te a ni. Hei bakah Mizoram aiawh ten National Level a trophy leh cup an lak engemaw zat chu dah a ni bawk.

Vawiin Museum hawnna ah hian Sports Minister hlui Pu Rualchhina leh hranghlui infiammi thahnem tak an tel a ni. Museum luh man hi puitling tan Rs. 10 leh naupang tan Rs. 5 tih a ni dawn a. Museum hawn lawmnan kar khat chung mipui ten man chawi lovin an tlawh thei ang.