Ni hnih chhung awh, Mizo hnam lama intihsiakna ‘Chief Minister’s Running Trophy in Cultural Dance Competition Vawi 10-na’, Art & Culture department leh CYMA tangkawp buatsaih chu vawiin khan Vanapa Hall-ah kharna inkhawm neih a ni a, Chief Minister Pu Lal Thanhawla chu khuallian a ni.

Chief Minister chuan sorkar leh Central YMA chu an thawh hona a that tawk thu sawiin, tuna hnam lama intihsiakna buatsaih a ni hi thalaiten hun awl an neihte an hman tangkai theih nan a ni a ti a. Thalaite hi nakina ram hruaitu tur an ni kan tih thin hi, nu leh pa thu zawmlo, zana mengrei, zinga thawh nachang hrelo leh aia upa zah nachang hre bawklo leh kohhran leh khawtlang pawisalo te hi chu ram hruaitu an ni theih a rin loh thu a sawi a. Kan pawnlam leh chhunglam nun kan uluk phawt chuan ram leh hnam tana mi tangkai, hruaitu tha kan ni thei a, chutiang mite chu khawiah pawh awmse, zahpui awmin an awm ngai lovang, Pu Lal Thanhawla chuan a ti a. Chuvangin thalaite chu nun uluk tur leh sorkarin a khawvel thar a siam sak mekna te hi chhawr tangkai thiam turin a chah a. CYMA nena an thawh hona hi changtlung zawka kal zel turin tan la chhoh sauh sauh turin thalaite chu duhsakna a hlan a ni.

Khualzahawm Pu PC Zoramsangliana, Art & Culture Minister chuan Mizo thalaite chu mahni hnam lam leh incheina ngaisangtu ni zel tura fuihin, hei hian khawvelah Mizote hi min pholang a ni a ti.

Chief Minister’s Running Trophy hi kum 2 dana neih thin a ni a. Tun tum a vawi 10-na, ni hnih chhunga intihsiakna ah hian Chai, Cheraw leh Chawnlam ah te inelna hi Lammualah buatsaih a ni a. YMA branch tel zawng zawngte hi an vaiin 49 an ni a, Aizawl khawpui pawn atangin branch 11 an tel a ni. A pumpuia lawmman pakhatna hi Ramthar North Branch in la-in, Rs. 30,000 leh trophy an dawng a; Pahnihna hi Ramhlun South Branch niin, Rs. 15,000/- leh trophy an dawng bawk a, 3rd - 10th-na in Rs. 10,000/- leh a tel zawng zawng branch in Rs. 7,500/- theuh an dawng bawk a ni. Item mal Chai, Chawnlam leh Cheraw ah te lawmman 3-na thleng siam anih bawk bakah member kal hnem ber lawmman, Art & Culture Director Award siam a ni bawk.