Vawiin chawhnu dar 1:30 khan NLUP Nodal Minister Pu H.Liansailova hovin ama office chamber-ah NLUP Monitoring & Evaluation Committee an thukhawm a, Mizoram Sorkar-in kut hnathawktute chhanchhuahna programme NLUP a kalpui chhoh mek dinhmunte thlir hovin uluk taka vil hna thawh dan turte an sawiho. Minister Pu H.Liansailova chuan khaw hrang hrang a tlawhna atangin NLUP tanpuina dawngtute chuan tih tak zetin an thawk ni-a a hriat thu leh hlawhtlinna tha tak a beiseiawm thu te a tarlang a. Tunah hian second instalment pek leh tur a nih avanga NLUP dawng tawhte hmalak dan leh bawhzui dan te uluk taka enfiaha vil (monitoring) thawh chhoh a hun tawh thu te a sawifiah bawk.

Vawiin meeting-ah hian thei/thlai chi beneficiary te hnena pek chu department mithiam ten a quality an enfiah zel tur a nih thu te inhrialhfiah a ni a, beneficiary te hnena tanpuina sum leh thlai chi te pek tur te chu a hun taka inpek a pawimawh thu te sawichhuah a ni a, chumi kawnga harsatna awm thei hrang hrangte sutkian dan te an ngaihtuah bawk. Meeting ah hian NLUP hmalakna thlen chin report te pharh a ni a, district tina line department te hmalak chin te an thlirho bawk. NLUP hmalakna tha taka enfiaha vil a nih theih nan Monitoring and Evaluation kalpui dan tur te, State, District leh Village Level Monitoring Committee hna thawh dan tur te, Central Vigilance Commission, Government of India duh dan anga sum hman dan langtlang taka ruahman dan tur te leh thil pawimawh dangte an relho a ni.

Monitoring & Evaluation Committee ah hian Committee Member atana ruat te bakah District tina Committee Chairman MLA te an tel a, vawiin Meeting ah hian Col.Zosangzuala, MLA - Aizawl District, Pu Joseph Lalhimpuia, MLA - Lunglei District, Pu H.Zothangliana, MLA - Saiha District, Pu T.T.Zothansanga, MLA - Champhai District, Pu K.Lalrinthanga, MLA - Kolasib District, Pu K.Lianzuala, MLA - Serchhip District, Pu Nirupam Chakma, MLA - Lawngtlai District te an kal a, Mamit District Committee Chairman Pu Lalrobiaka, MLA chu rokhawlhna avangin a tel thei lo a ni.