Aizawl District Addl. Dy. Commissioner i/c NLUP Cell chuan Industry hnuaia trade hrang hranga NLUP 2nd Phase sum dawngtu 11 (sawm pakhat) te hnenah an sum dawn an hman dik loh avangin ‘Show Cause Notice’ a pe.
Heng NLUP sum dawnga hmang dik lo 11 te hi Bungkawn Vengthar ah 3, Rangvamual ah 2, Vaivakawn, Chanmari W, Venghlui, Laipuitlang, Bawngkawn leh Dawrpui Vengthar ah pakhat theuhte an ni.
Addl. DC chuan NLUP Manual 2009, Bung III na in a sawilan ang leh NLUP Manual Annexure - II a an in tiamkamna anga tanpuina sum hi an hman dik loh chuan a pung (interest) 5% nena an sum hmuh tawh rul tur an nih lohna chhan, dawn chhunzawm tir tawh loh leh sorkar tanpuina dang reng reng dawng thei tawhlo tura hrem an nih lohna chhan tur sawifiah turin a ti a ni.
Tun June 21 thlenga NLUP sum hmang diklo te report thehluhna district hrang hranga Bawrhsap te hnena thehluh theih ah pawh report a lut nual tawh a, heng NLUP tanpuina sum hmang diklote hi enliam mai mai an ni dawn lo a ni.
