Chief Minister Pu Lal Thanhawla chuan miretheite khai chhuahna tura Mizoram sorkarin NLUP a kalpui mek ah sum hman tur a tam tawk a, “NLUP Third leh Fourth Phase te pawh kan kalpui zel dawn,” tiin vawiina autorickshaw sem leh beneficiary te thlahna hun, Govt.High School Field Zarkawt-a neih ah a sawi.

NLUP Phase II hnuaia autorickshaw beneficiary 63, Aizawl Champhai leh Mamit district khaw hrang hrang a mite chan turin autorickshaw te hi nizan khan Kolasib atangin Aizawl rawn khalh thlen a ni a. Vawiin a a semna function ah Chief Minister Pu Lal Thanhawla chuan thu sawiin India Hnam Pa, Mahatma Gandhi piancham ni ah tak NLUP hnuaia autorickshaw tanpuina sem theih a ni chu lawmawm a tih thu a sawi a. NLUP atan sum hman tur a tam tawk tih tarlangin tunah hian sanction tawh sa la hman loh vaibelchhe 100 chuang leh kum 2013-14 atana Planning Commission in a rawn released tawh vaiblechhe 370, a vaiin vaibelchhe 470 chuang hret hman nghal mai theihin a awm a ni, a ti. Pu Hawla chuan Central sorkar hruaitute thinlungah thawktu a awm avangin NLUP atana Mizoramin sum a dawn chu beisei aia tam a ni, a ti a. He project hi kan hlawhtlinpui ngei tur a ni, a ti bawk.

Pu Hawla chuan NLUP chu India ram ah chauh ni lo, ram pawn thlengin mithiam ten an ngaihven a.Tunah hian international organisation 3 - Food & Agriculture Organisation(FAO), United National Industrial Development Organisation (UNIDO) leh International Fund for Agriculture Development (IFAD) te nena thawh hona tur kawng ruahman mek a ni a. NLUP hian khawvel in a buaipui em em - ei leh bara intodelh te, leilung leh boruak chhe mek siam that lehna te tuihna kangchat mek siamthar lehna te a tinzawn tih hria a University of Minnesota chuan FAO Hqrs, Rome ah report an thehlut tawh a. Chumi rawn zirchiang turin India rama FAO Representative Peter Kenmore leh a thuihruai mithiam ten tun thla chhung hian Mizoram an rawn tlawh dawn a ni, a ti.

Pu Hawla chuan leimin tuarte chhawmdawlna tura sorkar hma chhawp mek tarlangin Ramhlun Vengthar leimin control leh chhawmdawl hna thawh nan Planning commission chuan sum vaibelchhe 21.02 a rawn pe chhuak tawh a ti a. Kum 2013-14 atan vaibelchhe 555.55 ruahman a nih thu leh leimin vanga in leh lo chan te inben bel nan Chite ah ram lei tura ruahman a nih thu a sawi.

Vawiina autorickshaw sem chhuah te nen hian NLUP hnuaia autorickshaw sem tawh zawng chu 251 a ni a. Chief Minister chuan beneficiary ten an eizawnna hmanrua an dawn theihna tura chhun leh zan pawh awl lova rim taka thawktu NLUP Implementing Board leh department hnathawktute inpekna hre reng a, rinawmna leh taimakna nen an mawhphurhna hlen ve turin benefriciary te chu a chah a. Beneficiary te chu eng political party mi leh sa pawh ni mah se, autorickshaw te chu an kuta hlan a nih rualin an ta a ni tawh a, an duh phawt chuan an awmna party flag apiang an tar thei tih a sawi a. Hemi rual hian eizawnna ngelnghet leh chhungkaw hlim tlang tak an nih theih na tur atan ruahman a nih avangin chumi hre reng chunga kalpui turin a chah bawk a ni.

Vawiina autorickshaw semna ah hian NIB Chairman Pu R.Selthuama’n welcome speech a sawi a. Industries Director Pu Biaktluanga IAS in technical report pe in Pu P.L.Thanga, NIBVice Chairman in lawmthu sawiin hun a khar a ni.