Ministry of Food Processing Industries, Government of India leh Mizoram Sorkar te bultumin Indian Chamber of Commerce te chuan vawiin khan Aijal Club-ah “North East Food Processing Conclave : Mizoram” tih thupui hmangin ni khat awh training an buatsaih a. Agriculture Minister Pu R Lalzirliana, Industries Minister Pu H Rohluna, Horticulture Minister Pu PC Lalthanliana te, Pu Zothan Khuma, Commissioner & Director of Industries leh Pu B Lalhmingthanga, Secretary of Holticulture te’n he programme hi an hmanpui a. Pi Madhuparna Bhowmick, Joint Director & Head, Agri & Food Business, Indian Chamber of Commerce-in he hun hi a kaihruai a ni.
Ministry of Food Processing Industries (MOFPI) bul tuma heti ang Technology thar leh man tlawm zawka kan thlai thar chhuahte sawngbawl nana hma lakna chu a lawmawm a tih thu Khuallian Pu R Lalzirliana chuan sawiin, stakeholder-te chu thahnem ngai taka he inhmuh khawmna hi hmang turin a chah a. Tunah hian Industrial Growth Centre Luangmual-ah bun a nih tawh thu leh Food Processing Unit atan hmun 24 lai ruahman lawk a nih thu a sawi bawk. Agriculture Department hian 2005 atang khan Oil palm lamah hma lo la tawhin private company-te nen MoU an lo sign tawh a; Godrej company-te phei chuan Kolasib District-ah Oil Plam Mill kum 2014 khan an rawn bun a, State danga hralh chhuah tur thahnem tak a awm a beisei thu a sawi a. Industries leh Food Processing lamah kan State hi a la hnufual avangin rual awh a la na hle a, he lam kawnga thiamna neite chuan thalaite cho phur a ngai a ni tiin, Agriculture Minister chuan mi mal intel khawma pawl indina Team Work anga kal a tulin a hun tawh a, chuti anga hma lak a nih chuan Sorkar pawh phungbawmah sawm theih reng an ni a ti a. Mizoram hian buh leh bal, thlai leh thei te thar tha zawkin man tlawm zawka hralh chhuak turin tih theih a ngah a, chuti ang atan chuan rilru kan pek a, kan ram intodelhna tur leh hlawkna tura he lam kawnga ke kan pen a ngaih thu a sawi bawk.
Khual Zahawm Pu H Rohluna, Industries Minister pawhin thu sawiin, kan ram Economy hmasawnna tur atana sul sutu pawimawh tak pahnih chu Industry leh Agriculture hi a ni a, chu chu kan ram leilung leh boruakin a zir avang hian Agriculture leh Horticulture lamah pawh beiseina a sang a, tuna State Sorkarin NLUP hmanga hma a lakna rah chhuah avang pawhin he lam kawnga thawh chhuah chuan rah tha tak, hlawk zawk a neih thuai a beisei thu leh vawiin Programme atang hian Mizoram tan Industries leh huan thlai lama kut hnathawktute hma lakna kawngah hmasawnna a awm ngei a beisei thu a sawi.
Horticulture Minister Pu PC Lalthanliana, Khual Zahawm chuan Indian Chamber of Commerce (ICC) te’n kut hnathawktute tanghma ngaia heti ang programme an rawn buatsaih chu lawmawm a tih thu leh kan ram awmna a kilkhawr deuh avanga huan thlaite hralhna atana harsatna a awm thin dan sawiin MOFPI te kaltlanga he’ng harsatna hi sut kian theih ngei a nih a beisei thu leh huan thlai, buh leh bal leh thei rah te a lo hlawk chuan lehkhathiam hna la nei lo tam tak tan pawh thawh tur a awm phah dawn a, chu chu kan ram thalai tam tak tan eizawnna tha tak a nih theih tur thu a sawi bawk.
He hun hmanpui tur hian State pawn lam atangin mi thiam tak tak, Dr Ng Iboyaima Singh, Senior Principal Scientist & Head Professor, Fruit and Vegetable Technology Department, CSIR-CFTRI; Pu N Nataraj, Assistant Director, Indian Institute for Packaging; Dr Goutam Das, Assistant Professor, IICPT, Guwahati; Pu PK Shah, Assistant General Manager, NABARD; Pu Rabindra Kumar Senapaty, Assistant General Manager (Rural Business), SBI leh Dr Deborshi De, CEO & Chief Advisor, Smart Management Consultancy te an lo kal a; special guest – Pu R.Zotawna, Director, Horticulture; Pu Lalzarliana, Director, Agriculture leh Pi Laldinpuii, Assistant Director, Industries te’n an hmanpui bawk. Sawi hona leh zir honain chawhnu lam hun hman a ni.
