3577/2024-2025

Dated Kolasib the 28th November 2024: Vawiin khan School of Nursing, Thingdawl, Kolasib chuan 6th Capping and Lamp lighting & 5th Graduation Ceremony chu an Campus ah an hmang a. He hun hi Kolasib DC, Robert C Lalhmangaiha chuan Khuallian niin a hmanpui a ni.

He hunah hian khuallian chuan kalkhawmte chibai a buk a. Nurse  hna chu anmahni mai ninovin chhungkua leh ram leh hnam tan a ni tih an hriat a pawimawh a ni, a ti a. An hna chu Lal Isua tihdam hna zuitu an ni tih an hriat a Krista zia nen thawk turin a  chah a. DC chuan Khawvel ah nursing chu demand a sang hle a chuvang chuan nurse zir pawh an tam chho zel dawn a,a zirlaite competition pawh a sang tial tial dawn a chuvang chuan theihtawp a tan la turin zirlai te chu a fuih a ni. Thingdawl a Nurse Training School chu District Administration lam atang pawh an theihna zawn zawna puih an in huam thu a sawi bawk.

Capping and Lamp lighting Ceremony hi Pi Lalrinpuii, Nursing Superintendent MSCI, Zemabawk chuan kaihruaiin Nurse zir chhuak leh zir turte chu an course an zawh hnu ah pawh in zir reng tur anni tih hria a midang tana hun hmang zel turin a chah  nghal bawk.

Vawiin hun  hi Pi Laltanpuii, Principal Nursing School Thingdawl in a kaihruai a. Capping Ceremony hi Nurse zir tan tir ten thla thum training an neih hnuah an hmang thin a ni.

School of Nursing School, Thingdawl Kolasib hian thawktu 16 neiin Zirlai hi kum tin 60 an nei thin a ni. A school hi changtlung chho ve zelin kumin khan BSC Nursing zirna atana upgrade tura thlan a ni a ruahmanna kalpui mek a ni. Tun dinhmunah Laboratory chi hrang hrang 6 an nei mek bawk. Thingdawl a  Nursing School-ah hian kuminah mi 20 an Graduate a, Mizoram chhungah pawh an result a tha hle a, an zirlai Christy Malsawmkimi chuan Mizoram pumpui ah ANM Final year ah pakhatna a hauh a ni.