No.201/2020-2021

COVID-19 vanga inkharkhip chhunga Lawngtlai District-a mi harsate tanpuina atan leh COVID-19 beihna kawnga District mamawh eng emaw chena phuhruk tura Officers' Club Lawngtlai (OCL) member-te'n "Sekibuhchhuak Charity" hming vuaha pawisa an thawh khawm Rs 1,00,000/- (nuai khat) chu vawiin khan District Level Task Force on COVID-19-ah an hlan.

He tanpuina sum hi DLTF Chairman, Lawngtlai Bawrhsap Pi Shashanka Ala, IAS chuan lo dawngin, OCL ai awhin Senior Vice President Pu R. Lalbiakthanga, District Sericulture Officer chuan a hlan a. Hruaitu eng emaw zatin an tawiawm a ni.

Hemi hma hian COVID-19 dona kawnga Lawngtlai DLTF tha tihchak nan Lawngtlai District Badminton Association chuan Rs 10,000/- an lo chhung lut tawh a. Heti hian DLTF-a tanpuina sum lut tawh zat hi Rs 1,10,000/- a ni.

COVID-19 hri leng mek kaihhnawihah hian Lawngtlai District chhunga mimal, kohhran, pawl leh office hminga luang chhuak an awm nual tawh a. Tlawmngai pawl anga hma latu pui ber Central YLA kutah tanpuina eng emaw zat a luh bakah, khua/veng hrang hranga VLTF-a lut eng emaw zat a awm bawk a. He'ngte leh sawrkar atanga ruahmanna hrang hrang avangin Lawngtlai District chhungah inkharkhip laia chhuanchham an awm lo tura beisei a ni.