He hun FCS&CA Director Pu Lallungmuana, IAS kaihruaiah hian thu sawiin Minister chuan he Fortnight hman chhan ber chu mipuite hnena Oil leh Gas renchem pawimawh zia zirtir a ni a ti a. Rampum leh Mizoram bikah pawh kumtin Oil leh Gas kan mamawh hi a pung chak em em a, chutih laiin kan mamawh hmun 3 a then a hmun 2 zet chu rampawn atanga chawk luh anih laiin Mizoram phei chuan engmah tharchhuah kan neih ve loh avangin kumtin Oil leh Gas atan sum namen lo kan sengral thin a ni a ti. Kum kalta chhunga Mizoramin sum a hmanral tarlangin Petrol-ah chuan Rs.83,14,90,410/- a ni a, Gas-ah Rs. 39,63,46,839/- anih laiin Diesel ah hian kan seng tam ber a Rs. 86,80,76,750/- lai kan hmangral a ni a ti. Mipuiten awlsam zawka eirawngbawlna Gas kan hmuh theih chu inthlan thuchah-ah tarlan anih ang ngeiin sorkar chuan theih tawp a chhuah zui zel ang Minister chuan a ti bawk.
Oil renchem kawngah hian Mizoram chu India rampuma ti tha ber state a ni thin a, kum kalta chhung pawh khan state te (small state) zingah a ti tha ber niin ‘Award for Outstanding Performance during Oil and Gas Conservation Fortnight’ chu January 19, 2009 hian Union Petrolium Minister Murli Deora chuan New Delhi-ah a hlan dawn nghe nghe a ni.
Vawiina Fortnight hmanna inkhawmah hian sorkar department hrang hrang hotu pawimawh bakah khawpui chhunga Gas Agents te, Petrol & Diesel Pump neitute an tel tha hle a ni.
